വിദ്യാർത്ഥി സ്കൂളിൽ ഷോക്കേറ്റ് മരിച്ചതിൽ പ്രതിഷേധം കടുക്കുന്നു ! പ്രതിഷേധമാർച്ചുമായി ബിജെപി; പരസ്‌പരം പഴിചാരി സ്കൂൾ മാനേജ്മെന്‍റും കെഎസ്ഇബിയും

കൊല്ലം തേവലക്കരയിൽ സ്കൂൾകെട്ടിത്തിന് മുകളിലെ വൈദ്യുതി കമ്പിയിൽനിന്ന് ഷോക്കേറ്റ് എട്ടാം ക്ലാസ് വിദ്യാർത്ഥി മരിച്ച സംഭവത്തിൽ പ്രതിഷേധമാർച്ചുമായി ബിജെപി-ആർഎസ്പി പ്രവർത്തകർ. അപകടത്തിൽ സ്കൂൾ മാനേജ്മെന്റിന് വീഴ്ചയുണ്ടായതായി ചൂണ്ടിക്കാട്ടിയാണ് പ്രതിഷേധം.

എന്നാൽ ദുരന്തത്തിൽ സ്കൂൾ മാനേജ്മെന്‍റും കെഎസ്ഇബിയും പരസ്പരം ആരോപണങ്ങൾ ഉന്നയിക്കുകയാണ്.
ലൈൻ മാറ്റി സ്ഥാപിക്കാൻ പലതവണ കെഎസ്ഇബിയോട് ആവശ്യപ്പെട്ടിട്ടും നടപടിയുണ്ടായില്ല എന്ന് നാട്ടുകാർ നേരത്തെ ആരോപിച്ചിരുന്നു. എന്നാൽ ഷെഡ്ഡിന്‍റെ മേൽക്കൂരയോട് ചേർന്ന് കടന്നുപോകുന്ന വൈദ്യുതി ലൈൻ മാറ്റി കേബിളാക്കുന്നതിന് ഷെഡ് പൊളിച്ചു തരണമെന്ന് ആവശ്യപ്പെട്ടിരുന്നുവെന്നാണ് കെഎസ്ഇബി പറഞ്ഞത്. ജൂലൈ 15-ന് തേവലക്കര അസി. എഞ്ചിനീയർ സ്കൂൾ അധികൃതരോട് ഇക്കാര്യം ആവശ്യപ്പെട്ടുവെന്നാണ് റിപ്പോർട്ട്. സൈക്കിൾ ഷെഡ് നിർമ്മാണത്തിന് പഞ്ചായത്തിന്റെ അനുമതി വാങ്ങിയിട്ടില്ലെന്നും ആരോപണമുണ്ട്.

സംഭവത്തിൽ പൊതുവിദ്യാഭ്യാസ ഡയറക്ടർക്ക് അന്വേഷണച്ചുമതല നൽകി. വിഷയത്തിൽ വിശദാന്വേഷണം നടത്തി അടിയന്തര റിപ്പോർട്ട് സമർപ്പിക്കാൻ വൈദ്യുതമന്ത്രിയും നിർദേശം നൽകിയിട്ടുണ്ട്. ചീഫ് ഇക്ട്രിക്കൽ ഇൻസ്പെക്ട‌റും കെഎസ്ഇബിയും സംഭവം അന്വേഷിക്കും. തേവലക്കര ബോയ്സ് സ്കൂളിലെ എട്ടാം ക്ലാസ് വിദ്യാ‍ര്‍ത്ഥിയായ മിഥുൻ (13) ആണ് മരിച്ചത്. സ്കൂൾ കെട്ടിടത്തിന് മുകളിൽ വീണ ചെരിപ്പെടുക്കാൻ ശ്രമിക്കുന്നതിനിടെയാണ് അപകടമുണ്ടായത്.

ബെഞ്ച് എടുത്ത് ഷീറ്റിനുമേൽ വെച്ചശേഷമായിരുന്നു ചെരിപ്പെടുക്കാനുള്ള ശ്രമം. തെന്നിയപ്പോൾ വീഴാതിരിക്കാൻ വേണ്ടി കൈ നീട്ടിയത് തൊട്ടടുത്തുള്ള ത്രീ ഫെയ്സ് ലൈനിലായിരുന്നു. തൊട്ടടുത്തുള്ള വീട്ടിലേക്കുള്ള വൈദ്യുത ലൈനായിരുന്നു ഇത്.

ഷോക്കേറ്റത് കണ്ട് ഓടിയെത്തി അദ്ധ്യാപകർ ഉടൻ തന്നെ ഓടിപ്പോയി ട്രാൻസ്ഫോർമർ ഓഫ് ചെയ്തു. കുട്ടിയെ മേൽക്കൂരയിൽ നിന്ന് താഴെയിറക്കി ശാസ്താം കോട്ട ആശുപത്രിയിലേക്ക് കൊണ്ട് പോയെങ്കിലും ജീവൻ രക്ഷിക്കാനായില്ല.