പഞ്ചാബ് അതിർത്തിവഴി മയക്കുമരുന്ന് കടത്താൻ ശ്രമം; പാകിസ്ഥാനിൽനിന്നും മയക്കുമരുന്നുമായി വന്ന ഡ്രോൺ വെടിവെച്ചിട്ട് സൈന്യം; ലഹരി മരുന്നിനൊപ്പം തോക്കും കണ്ടെടുത്തു

പഞ്ചാബ്: മയക്കുമരുന്നുമായി വന്ന ഡ്രോൺ വെടിവെച്ചിട്ട് സൈന്യം. പാകിസ്ഥാനിൽ നിന്നും പഞ്ചാബിലെ അമൃത്സർ അതിർത്തി വഴി ലഹരിമരുന്ന് ഇന്ത്യയിലേക്ക് കടത്താനായിരുന്നു കള്ളക്കടത്തു സംഘത്തിന്റെ പദ്ധതി. അതിർത്തികൾ കേന്ദ്രീകരിച്ച് ഭീകരർ നടത്തുന്ന ഇത്തരം ശ്രമങ്ങളെ നിരവധി തവണയായി സൈന്യം ഇല്ലാതാക്കാൻ ശ്രമിച്ചിരുന്നു.

അതിർത്തിയിൽ ജാഗ്രതാ നിർദ്ദേശം ശക്തമാക്കിയിട്ടുണ്ട്. സംഭവം നടന്ന് മണിക്കൂറുകൾ കഴിഞ്ഞിട്ടും പാകിസ്ഥാന്റെ ഭാഗത്തു നിന്നും പ്രതികരണം വന്നിട്ടില്ലെന്ന് സൈനിക വൃത്തങ്ങൾ വ്യക്തമാക്കി. പട്രോളിംഗ് നടത്തുന്ന സമയത്ത് ആകാശത്ത് പറന്നു നടക്കുന്ന നിലയിൽ കണ്ട ഡ്രോണിനെ സൈന്യം ഉടൻ തന്നെ വെടിവച്ചിടുകയായിരുനു.

തിരച്ചിൽ നടത്തിയ ഡ്രോണിൽ നിന്നും മൂന്ന് പായ്‌ക്കറ്റ് ഹെറോയിൻ, ഒരു പിസ്റ്റൾ, ഒരു മാഗാസിൻ , നിരവധി വെടി ഉണ്ടകൾ എന്നിവയും സൈന്യം കണ്ടെടുത്തു. ഇന്ത്യയിലേക്ക് അതിർത്തികൾ വഴി ലഹരി വസ്തുക്കൾ കടത്താൻ ഭീകരർ ശ്രമിക്കാറുണ്ട്. നിരവധി തവണ ശ്രമം പരാജയപ്പെടുത്തുകയും പാകിസ്ഥാന് സൈന്യം മുന്നറിയിപ്പ് നൽകുകയും ചെയ്തിരുന്നു.