പൗർണ്ണമിക്കാവ് ശ്രീ ബാല ത്രിപുര സുന്ദരീ ദേവീ ക്ഷേത്ര നട വരുന്ന തിങ്കളാഴ്ച തുറക്കും ; നിറപുത്തരി അടക്കമുള്ള സവിശേഷ ചടങ്ങുകൾ ; ഭക്തർക്കായി സൗജന്യ മെഡിക്കൽ ക്യാമ്പും സജ്ജം

തിരുവനന്തപുരം : വിഴിഞ്ഞം വെങ്ങാനൂർ പൗർണ്ണമിക്കാവ് ശ്രീ ബാല ത്രിപുര സുന്ദരീ ദേവീ ക്ഷേത്രത്തിൽ ചിങ്ങമാസത്തിലെ പൗർണ്ണമി ദിനമായ വരുന്ന തിങ്കളാഴ്ച നട തുറക്കും. പുലർച്ചെ നാലര മണി മുതൽ രാത്രി 10:30 മണി വരെ നട തുറന്നിരിക്കും. രാവിലെ നിറപുത്തരി ചടങ്ങും ഉണ്ടായിരിക്കും.

യാഗശാലയിൽ രാവിലെ 9 മണിക്ക് മൃത്യുഞ്ജയ ഹോമം, 11 മണിക്ക് ലക്ഷ്മി കുബേര പൂജ എന്നിവ ഉണ്ടാകും. ശ്രീകോവിലിൽ 12:30ക്ക് കലശാഭിഷേകം. ശനീശ്വര ഭഗവാന് ശനിദോഷശാന്തി പൂജ രാവിലെ മുതൽ രാത്രി വരെ ചെയ്യുന്നതാണ്.

12 മണി മുതൽ 1:30 വരെ കൊഞ്ചിറവിള സനാതന മ്യൂസിക് അക്കാഡമി അവതരിപ്പിക്കുന്ന നൃത്താഞ്ജലി.4 മുതൽ 6 വരെ തിരുവനന്തപുരം സ്വരമാലികയുടെ ഭക്തിഗാനമേള. 6 മുതൽ 6.30 വരെ ശാസ്തമംഗലം രുദ്രതാളം കലാസമിതിയിലെ വൃന്ദ ജെ നായർ അവതരിപ്പിക്കുന്ന കുച്ചുപ്പുടി. 6.45 മുതൽ 7.15 വരെ വിഷ്ണുപ്രിയ അനിൽകുമാർ അവതരിപ്പിക്കുന്ന ഭരതനാട്യം. 7.15 മുതൽ 8 15 വരെ നാട്യദർപ്പണയുടെ നൃത്തനൃത്യങ്ങൾ. 8.15 മുതൽ 9.30 വരെ മണമ്പൂർ തോപ്പുവിള ശ്രീരാഗം കലാസമിതിയുടെ കൈകൊട്ടിക്കളി.

പൗർണ്ണമിക്കാവിൽ റിപ്പോർട്ട് ചെയ്യാൻ വരുന്ന മാദ്ധ്യമപ്രവർത്തകർക്കായുള്ള മീഡിയാ റൂമിന്റെ ഉദ്ഘാടനം രാവിലെ 9 മണിക്ക് മഠാധിപതി സിൻഹാ ഗായത്രി നിർവഹിക്കും.രാവിലെ മുതൽ പൗർണ്ണമിക്കാവിലെ ഭക്തർക്കായി സൗജന്യ മെഡിക്കൽ ക്യാമ്പ് ഉണ്ടായിരിക്കും.