കാര്യവട്ടം ഗവണ്‍മെന്‍റ് കോളേജിലെ റാഗിംഗ് ! എസ്എഫ്ഐ പ്രവർത്തകർക്ക് സസ്പെൻഷൻ

തിരുവനന്തപുരം : കാര്യവട്ടം ഗവണ്‍മെന്‍റ് കോളേജിൽ ഒന്നാം വർഷ ബിരുദ വിദ്യാർത്ഥിയെ റാഗിംഗിന് വിധേയരാക്കിയ എസ്എഫ്ഐ പ്രവർത്തകരായ ഏഴ് വിദ്യാർത്ഥികൾക്ക് സസ്പെൻഷൻ. വിവസ്ത്രനാക്കിയും മുളവടികൊണ്ട് തലയ്ക്കടിച്ചും തുപ്പിയ വെള്ളം കുടിപ്പിച്ചുമായിരുന്നു ക്രൂരത. കോളേജിലെ റാഗിംഗ് കമ്മിറ്റിയുടെ റിപ്പോർട്ടിന്റെ അടിസ്ഥാനത്തിൽ കഴക്കൂട്ടം പോലീസ് അന്വേഷണം തുടങ്ങിയിട്ടുണ്ട്.എസ്എഫ്ഐ. യൂണിറ്റ് സെക്രട്ടറിയടക്കമുള്ളവരാണ് പ്രതിപ്പട്ടികയിലുള്ളത്.

എസ്എഫ്ഐ യൂണിറ്റ് റൂമിലെത്തിച്ചായിരുന്നു തന്നെ ക്രൂരമായി ഉപദ്രവിച്ചതെന്ന് റാഗിംഗിനിരയായ വിദ്യാർത്ഥി വെളിപ്പെടുത്തി. ഒരു മണിക്കൂറോളം മുറിയിൽ തടഞ്ഞുവെച്ച് വിചാരണ ചെയ്തു. സിസിടിവി ദൃശ്യങ്ങളും സാക്ഷിമൊഴിയും പരിശോധിച്ചാണ് റാ​ഗിങ് കമ്മിറ്റി റിപ്പോർട്ട് സമർപ്പിച്ചത്. പോലീസ് അന്വേഷണത്തിലൂടെ സത്യം പുറത്തുവരട്ടെയെന്നും പിന്നീട് പ്രതികരിക്കാമെന്നുമാണ് എസ്എഫ്ഐ ജില്ലാ നേതൃത്വത്തിന്റെ വിശദീകരണം.