നോവായി രഞ്ജിത..അഗ്നി വിഴുങ്ങിയ സീറ്റിൽ അവശേഷിച്ചത് കത്തികരിഞ്ഞ സ്വര്‍ണമാലയും ചെരിപ്പും; ബന്ധുക്കൾക്ക് കൈമാറി

അഹമ്മദാബാദ് വിമാന ദുരന്തത്തിൽ മരിച്ച മലയാളി നഴ്സ് രഞ്ജിത അപകടസമയത്ത് ധരിച്ചിരുന്ന മാലയും മോതിരവും അധികൃതര്‍ ബന്ധുക്കൾക്ക് കൈമാറി. രഞ്ജിത ഇരുന്ന 19 എഫ് എന്ന സീറ്റിനടുത്തു നിന്നു കിട്ടിയ വസ്തുക്കളാണ് ബന്ധുക്കൾക്ക് കൈമാറിയത്. 90 ശതമാനവും കരിഞ്ഞുരുകിയ നിലയിലാണ് സ്വർണമാല. മാലയ്ക്ക് പുറമെ മോതിരം, വസ്ത്രത്തിന്റെ കത്താത്ത ഭാഗം, ചെരിപ്പ് എന്നിവയാണ് പ്രത്യേക പെട്ടിയിലാക്കിയാണ് ബന്ധുക്കൾക്ക് കൈമാറിയത്.

സർക്കാർ ജോലിയിൽ തിരികെ പ്രവേശിക്കാനുള്ള അനുമതി ലഭിച്ചതിനെ തുടർന്ന് നടപടിക്രമങ്ങൾ പൂർത്തിയാക്കാനായിരുന്നു രഞ്ജിത നാട്ടിൽ എത്തിയത്. തിരികെ ലണ്ടനിലേക്കു മടങ്ങവേയായിരുന്നു അപ്രതീക്ഷിത ദുരന്തം. ഏറെ മോഹിച്ചു നിർമ്മിച്ചു കൊണ്ടിരിക്കുന്ന വീടിന്‍റെ പണി പൂർത്തിയാകാതെയാണ് രഞ്ജിതയുടെ മടക്കം. കുടുംബ വീടിനോട് ചേർന്ന് പുതുതായി പണിയുന്ന വീടിന്‍റെ ഒരു മുറിയും അടുക്കളയും പൂർത്തിയാക്കി അമ്മയെയും കുട്ടികളെയും ജൂൺ 28ന് വീട്ടിൽ പ്രവേശിപ്പിക്കണമെന്ന് കോൺട്രാക്ടർക്ക് നിർദ്ദേശം നൽകിയാണ് രഞ്ജിത ലണ്ടനിലേക്ക് വിമാനം കയറിയത്. നാട്ടിൽ മടങ്ങിയെത്തിയ ശേഷം ബാക്കി പണി പൂർത്തിയാക്കാമെന്നായിരുന്നു പ്രതീക്ഷ.