ബംഗാളിലെ ബലാത്സംഗക്കൊല !അന്വേഷണം അവസാനഘട്ടത്തിൽ ; ഡിഎൻഎ പരിശോധന ഫലത്തിനായി കാത്ത് സിബിഐ ; അന്തിമ റിപ്പോർട്ട് ഒരാഴ്ചക്കുള്ളിൽ

കൊൽക്കത്ത : പശ്ചിമബംഗാൾ സർക്കാർ നിയന്ത്രണത്തിലുള്ള ആർ ജി കർ മെഡിക്കൽ കോളേജ് ആശുപത്രിയിൽ യുവ വനിതാ ഡോക്ടർ ക്രൂര ബലാത്സംഗത്തിനിരയായി കൊല്ലപ്പെട്ട കേസിൽ അന്വേഷണം അവസാനഘട്ടത്തിലാണെന്ന് സിബിഐ. കേസിൽ ഡിഎൻഎ പരിശോധന ഫലത്തിനായി കാത്തിരിക്കുകയാണ് സിബിഐ. ഫലം ലഭിക്കുന്നതോടെ അന്വേഷണം പൂർത്തിയാകും. ഒരാഴ്ചക്കുള്ളിൽ അന്തിമ റിപ്പോർട്ട് തയ്യാറാകും.

കൊല്ലപ്പെട്ട ഡോക്ടറുടെ കുടുംബവും സമരം ചെയ്യുന്ന ഡോക്ടർമാരും സംഭവത്തിൽ സിബിഐ അന്വേഷണത്തിനായി വലിയ രീതിയിൽ സമ്മർദ്ദം ചെലുത്തിയിരുന്നു. കേസിൽ പശ്ചിമ ബംഗാൾ സർക്കാരിന്റെയും പോലീസിന്റെയും അനാസ്ഥ ചൂണ്ടിക്കാട്ടി കഴിഞ്ഞ കൊൽക്കത്ത ഹൈക്കോടതിയാണ് കേസിന്റെ അന്വേഷണം സിബിഐയ്ക്ക് കൈമാറിയത്. കേസിലെ പ്രതിയായ സഞ്ജയ് റായ് കൊൽക്കത്ത പൊലീസിലെ സിവിക് വൊളന്റിയറാണ്.ഇയാളുടെ മൊബൈൽ ഫോണുമായി ബന്ധപ്പെട്ട വിശദാംശങ്ങൾ പരിശോധിച്ചതിന്റെ അടിസ്ഥാനത്തിൽ ഇയാൾ മാത്രമാണ് പ്രതി എന്നാണ് മനസിലാകുന്നതെന്ന് സിബിഐ വ്യക്തമാക്കുന്നു. അടുത്ത ഘട്ടമെന്ന നിലയിലാണ് ഡിഎൻഎ ഫലം കാത്തിരിക്കുന്നത്.

കൊല്ലപ്പെട്ട ഡോക്ടറുടെ ശരീരത്തിൽ നിന്നും ശേഖരിച്ച സാംപിളുകൾ ദില്ലി എയിംസിൽ പരിശോധനക്ക് അയച്ചിട്ടുണ്ട്. രണ്ട് മൂന്ന് ദിവസത്തിനുള്ളിൽ ഈ പരിശോധന ഫലം ലഭിക്കുമെന്ന് സിബിഐ പറയുന്നു. എല്ലാ ശാസ്ത്രീയ തെളിവുകളും ഈ പ്രതിയിൽ തന്നെ കേന്ദ്രീകരിക്കുന്നു എന്നാണ് സിബിഐയും വ്യക്തമാക്കുന്നത്. അടുത്തയാഴ്ച റിപ്പോർട്ട് സിബിഐ സുപ്രീം കോടതിയിൽ സമർപ്പിക്കും. ശേഷം കേസ് വീണ്ടും സുപ്രീം കോടതി പരി​ഗണിക്കും.