അമ്മയുടെ ഓഫീസിൽ വീണ്ടും പരിശോധന !! ഓഫീസിലെത്തിയിരിക്കുന്നത് ഇടവേള ബാബുവിനെതിരായ കേസ് അന്വേഷിക്കുന്ന സംഘം

കൊച്ചി : താരസംഘടന അമ്മയുടെ കൊച്ചിയിലുള്ള ഓഫീസിൽ വീണ്ടുംപോലീസ് പരിശോധന. ഇന്ന് രണ്ട് തവണയാണ് പോലീസ് ഓഫീസിൽ പരിശോധന നടത്തിയത്. നടൻമാരായ ഇടവേള ബാബു, മുകേഷ് എന്നിവർക്കെതിരേയുള്ള ലൈം​ഗിക പീഡന പരാതിയിന്മേൽ തെളിവ് ശേഖരണത്തിനായാണ് പ്രത്യേക അന്വേഷണസംഘം അമ്മ ഓഫീസിലെത്തി പരിശോധന നടത്തിയത്. സംഘടനയിലെ അംഗത്വവുമായി ബന്ധപ്പെട്ടും ഭാരവാഹി തെരഞ്ഞെടുപ്പുമായി ബന്ധപ്പെട്ടുള്ള രേഖകളിൽ വ്യക്തത വരുത്താനും ഇവർ സംഘടനാ ഭാരവാഹികൾ ആയിരുന്നെന്ന് തെളിയിക്കുന്നതിനുള്ള രേഖകൾ കണ്ടെത്തുന്നതിനായാണ് പരിശോധന നടന്നത്.

നടൻ ഇടവേള ബാബുവിനെതിരായ കേസ് അന്വേഷിക്കുന്ന സംഘമാണ് രണ്ടാമതായി പരിശോധനയ്‌ക്കെത്തിയത് എന്നാണ് അറിയാൻ കഴിയുന്നത്.ഇടവേള ബാബുവിനെതിരേ ആലുവ സ്വദേശിയായ നടി ലൈം​ഗിക പീഡനപരാതി ഉന്നയിച്ചിരുന്നു. അമ്മയിൽ അം​ഗത്വം വാ​ഗ്ദാനം ചെയ്താണ് ലെെം​ഗിക അതിക്രമം നടത്തിയതെന്നായിരുന്നു നടിയുടെ ആരോപണം. ഇത് സംബന്ധിച്ച് എറണാകുളം നോർത്ത് പോലീസ് സ്റ്റേഷനിൽ പരാതിയുണ്ട്. ജാമ്യമില്ലാവകുപ്പ് പ്രകാരമാണ് കേസ്. നടിയുടെ മൊഴിയെ പിന്തുണക്കുന്നതിനുള്ള തെളിവുകൾ ശേഖരിക്കുന്നതിനായാണ് പരിശോധന.