വാഹനം വാങ്ങിയതുമായി ബന്ധപ്പെട്ട ചെക്ക് കേസിൽ റോബിൻ ബസ് ഉടമ ഗിരീഷ് അറസ്റ്റിൽ !പോലീസ് പൊടി തട്ടിയെടുത്തത് 2012 ലെ കേസ് ! പ്രതികാര നടപടിയെന്ന് കുടുംബം

ഈരാറ്റുപേട്ട : വാഹനം വാങ്ങിയതുമായി ബന്ധപ്പെട്ട ചെക്ക് കേസിൽ റോബിൻ ബസ് ഉടമ ഗിരീഷിനെ പോലീസ് അറസ്റ്റ് ചെയ്തു. ഈരാറ്റുപേട്ടയിലെ വീട്ടിൽ നിന്ന് കസ്റ്റഡിയിലെടുത്ത ഗിരീഷുമായി പൊലീസ് സംഘം എറണാകുളത്തേക്ക് തിരിച്ചു. മരട് പൊലീസ് സ്റ്റേഷനിലാണ് മറ്റ് നടപടികൾ നടക്കുക. കോടതി അവധിയായ ഇന്ന് ജഡ്ജിയുടെ വസതിയിലാകും അദ്ദേഹത്തെ ഹാജരാക്കുക. 2012ൽ ഗിരീഷ് ഒരു വാഹനം വാങ്ങിയതുമായി ബന്ധപ്പെട്ട ചെക്ക് കേസ് പോലീസ് പൊടിതട്ടിയെടുത്തത് അദ്ദേഹത്തിനെതിരായ പ്രതികാര നടപടിയെന്ന ആക്ഷേപം ഇതിനോടകം ഉയർന്നിട്ടുണ്ട്. പ്രതികാര നടപടിയാണെന്ന് ഗിരീഷിന്റെ അഭിഭാഷകനും കുടുംബവും ആരോപിക്കുന്നു.

കോടതിയിൽ ഹാജരാക്കിയാൽ റോബിനെ റിമാൻഡ് ചെയ്യിക്കാനുള്ള ശ്രമങ്ങളാണ് നടന്നുവരുന്നത്. റോബിൻ ബസും ഉടമ ഗിരീഷും എംവിഡിയുടെയും സർക്കാരിന്റെയും നോട്ടപ്പുള്ളിയാണ്. തുടർച്ചയായ നിയമലംഘനത്തിന് ബസിന്റെ പെർമിറ്റും ഡ്രൈവർമാരുടെ ലൈസൻസും റദ്ദാക്കാൻ നടപടി തുടങ്ങിയെന്ന് എൻഫോഴ്സ്മെന്റ് ആർടിഒ അധികൃതർ അറിയിച്ചിരുന്നു. അഖിലേന്ത്യ പെർമിറ്റുള്ള റോബിൻ ബസ് കേരള മോട്ടോർ വാഹനവകുപ്പ് പിടിച്ചെടുത്തത് അതിന്റെ ഭാഗമാണ്. തുടർച്ചയായ പെർമിറ്റ് ലംഘനം ചൂണ്ടിക്കാട്ടിയാണ് ഈ ഇടപെടൽ. പത്തനംതിട്ട – കോയമ്പത്തൂർ സർവീസ് നടത്തിയ ബസ് പത്തനംതിട്ട എൻഫോഴ്സ്മെന്റ് ആർടിഒയാണ് പിടിച്ചെടുത്തത്. ഹൈക്കോടതി നിർദ്ദേശപ്രകാരമുള്ള പിഴ അടച്ചില്ലെന്നു ചൂണ്ടിക്കാട്ടി നിയമ നടപടികളും തുടരും.