ശബരിമല കീഴ്‌ശാന്തിയുടെ സഹായി കുഴഞ്ഞുവീണു മരിച്ചു; ശുദ്ധിക്രിയ നടത്തി 20മിനിട്ട് വെെകി നട തുറന്നു

പത്തനംതിട്ട: ശബരിമല കീഴ്‌ശാന്തിയുടെ സഹായി കുഴഞ്ഞുവീണു മരിച്ചു. തമിഴ്നാട് കുംഭകോണം സ്വദേശി രാംകുമാർ (43) ആണ് മരിച്ചത്. രാവിലെ മുറിയിൽ കുഴഞ്ഞു വീണ നിലയിൽ കണ്ടെത്തുകയായിരുന്നു. മറ്റ് സഹായികൾക്ക് ഒപ്പമായിരുന്നു വിശ്രമമുറിയിൽ താമസിച്ചിരുന്നത്. സന്നിധാനം ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

  തന്ത്രി കണ്ഠര് മഹേഷ് മോഹനരുടെ കാർമികത്വത്തിൽ ക്ഷേത്രത്തിൽ ശുദ്ധിക്രിയ നടത്തിയാണ് നട തുറന്നത്. സംഭവത്തെ തുടർന്ന് ഇന്ന് ശബരിമല നട തുറക്കാൻ 20 മിനിട്ടോളം വെെകി. നട തുറക്കാൻ വെെകിയതിനാൽ തീർത്ഥാടകർ ഏറെ നേരം കാത്തുനിൽക്കേണ്ടിവന്നു.

അതേസമയം,​ വലിയ തിരക്കാണ് സന്നിധാനത്ത് അനുഭവപ്പെടുന്നത്. ശബരിമലയിലെ തിരക്ക് നിയന്ത്രിക്കുന്നതിന് അടിയന്തര നടപടിയെടുക്കാൻ പത്തനംതിട്ട ജില്ലാ കളക്ടർക്കും പൊലീസ് മേധാവിക്കും ഹൈക്കോടതി ഇന്നലെ നിർദ്ദേശം നൽകിയിരുന്നു. കഴിഞ്ഞദിവസങ്ങളിൽ ദർശനത്തിന് 10 മണിക്കൂറിലേറെ കാത്തുനില്‌ക്കേണ്ടി വന്ന സാഹചര്യം വിലയിരുത്തിയാണ് കോടതിയുടെ നടപടി.