സഞ്ജു തരംഗം ആഞ്ഞു വീശുന്നു; താരത്തെ പ്രകീർത്തിച്ച് ക്രിക്കറ്റ് കമന്റേറ്റർ ഹർഷ ഭോഗ്‍ല

അഹമ്മദാബാദ് : ഗുജറാത്ത് ടൈറ്റൻസിനെതിരായ മാച്ച് വിന്നിങ് പ്രകടനത്തിന് പിന്നാലെ മലയാളി ക്രിക്കറ്റ് താരം സഞ്ജു സാംസണെ പുകഴ്ത്തി ക്രിക്കറ്റ് കമന്റേറ്റർ ഹർഷ ഭോഗ്‍ല. താനായിരുന്നു ടീം സെലക്ടർ എങ്കിൽ സഞ്ജു സാംസണെ ഇന്ത്യയ്ക്കായി ട്വന്റി20 ടീമില്‍ എല്ലാ ദിവസവും കളിപ്പിക്കുമായിരുന്നുവെന്നായിരുന്നു ഹർഷ ഭോഗ്‍ലയുടെ ട്വീറ്റ്. ഗുജറാത്ത് ടൈറ്റൻസിനെതിരെ സ്റ്റാർ ബൗളർ റാഷിദ് ഖാനെതിരായ ഹാട്രിക് സിക്സ് അടക്കമുള്ള സഞ്ജുവിന്റെ വെടിക്കെട്ട് ബാറ്റിങ്ങിനു പിന്നാലെയാണു ഹർഷ ഭോഗ്‍‌ലയുടെ പ്രശംസ.

മത്സരത്തിലാകെ 32 പന്തുകൾ നേരിട്ട സ‍‍ഞ്ജു, മൂന്നു ഫോറും ആറു സിക്സും സഹിതം അടിച്ചുകൂട്ടിയത് 60 റൺസാണ്. മൂന്നാം വിക്കറ്റിൽ മലയാളി താരം ദേവ്ദത്ത് പടിക്കലിനൊപ്പം 34 പന്തിൽനിന്ന് 43 റൺസ് അടിച്ചെടുത്ത സഞ്ജു, അഞ്ചാം വിക്കറ്റിൽ ഹെറ്റ്മെയറിനൊപ്പം 27 പന്തിൽ 59 റൺസും സ്‌കോർ ബോർഡിൽ കൂട്ടിച്ചേർത്തു.

ട്വന്റി20യിൽ ലോക ഒന്നാം നമ്പർ ബോളറായ റാഷിദിനെതിരെ ഐപിഎലിൽ ഹാട്രിക് സിക്സ് നേടുന്ന രണ്ടാമത്തെ മാത്രം താരമാണ് സഞ്ജു. യൂണിവേഴ്‌സൽ ബോസ് എന്ന പേരിൽ അറിയപ്പെടുന്ന വിൻഡീസ് സൂപ്പർതാരം ക്രിസ് ഗെയ്‍ലാണ് ഇതിന് മുമ്പ് ഐപിഎല്ലിൽ റാഷിദിനെതിരെ ഹാട്രിക് സിക്സ് നേടിയിട്ടുള്ളത്. ഈ മൂന്നു സിക്സറുകളിലൂടെയാണ് മത്സരത്തിന്റെ ഗതി രാജസ്ഥാന് അനുകൂലമാക്കിയത്. മത്സരത്തിൽ മൂന്ന് വിക്കറ്റിനാണ് ഗുജറാത്ത് ടൈറ്റൻസിനെ രാജസ്ഥാൻ റോയൽസ് തകർത്തത്.