സഭാതർക്ക കേസിലെ റിപ്പോർട്ട് ഇന്ന് സുപ്രീംകോടതിയിൽ: പരിഗണിക്കുന്നത് ഇരുന്നൂറോളം കേസുകൾ

ദില്ലി: മലങ്കര സഭാതർക്ക വിഷയത്തിൽ ഹൈക്കോടതി രജിസ്ട്രാർ ജനറൽ നൽകിയ റിപ്പോർട്ടുകൾ ഇന്ന് സുപ്രീംകോടതി പരിശോധിക്കും. സുപ്രീംകോടതി സ്വമേധയാ ലിസ്റ്റ് ചെയ്ത കേസ് പരിഗണിക്കുമ്പോളാണ് ഓർത്തഡോക്സ്- യാക്കോബായ തർക്കവുമായി ബന്ധപ്പെട്ട് നിലനിൽക്കുന്ന കേസുകളെക്കുറിച്ച് ഹൈക്കോടതി രജിസ്ട്രാർ ജനറൽ നൽകിയ റിപ്പോർട്ടുകൾ പരിശോധിക്കുക. ഈ വിഷയത്തിൽ സമർപ്പിച്ച ഇരുനൂറോളം കേസുകൾ  ജസ്റ്റിസ് അരുൺ മിശ്രയുടെ ബെഞ്ചാണ് പരിഗണിക്കുന്നത്.

ഇടവകാംഗങ്ങളുടെ മൃതദേഹം പള്ളിസെമിത്തേരിയിൽ സംസ്കരിക്കുന്നത് അവകാശമാക്കി സംസ്ഥാനസർക്കാർ ഓർഡിനൻസ് ഇറക്കാനൊരുങ്ങുന്ന സാഹചര്യത്തിലാണ് കേസ് സുപ്രീംകോടതി പരിഗണിക്കുന്നത്. ഓർഡിനൻസിൽ ഗവർണർ ഒപ്പുവെച്ച് പുറത്തിറങ്ങിയിട്ടില്ലാത്തതിനാൽ അതിനെ ചോദ്യംചെയ്യുന്ന കേസുകളില്ല. എന്നാൽ, ഇന്ന് കേസ് പരിഗണിക്കുമ്പോൾ ഓർഡിനൻസിനെക്കുറിച്ച് അഭിഭാഷകർ ശ്രദ്ധയിൽപ്പെടുത്തിയാൽ സുപ്രീംകോടതി നടത്തുന്ന പരാമർശം നിർണായകമാകും.

പള്ളിത്തർക്കവുമായി ബന്ധപ്പെട്ട് ഇനിയൊരു കേസും പാടില്ലെന്നും തങ്ങളുടെ വിധി പാലിക്കാൻ എല്ലാ കോടതികൾക്കും ബാധ്യതയുണ്ടെന്നും സെപ്റ്റംബർ ആറിന് സുപ്രീംകോടതി വ്യക്തമാക്കിയിരുന്നു. ഹൈക്കോടതി ഉൾപ്പെടെ കേരളത്തിലെ ഒരു കോടതിയും സുപ്രീംകോടതിയുടെ വിധി ലംഘിക്കുന്ന ഉത്തരവുകളിറക്കരുതെന്നും അങ്ങനെയുണ്ടായാൽ വളരെ ഗൗരവത്തോടെ കാണുമെന്നും ജസ്റ്റിസ് മിശ്ര മുന്നറിയിപ്പുനൽകി. തുടർന്ന്, വിവിധ കോടതികളിലെ കേസുകളുടെ കണക്ക് വ്യക്തമാക്കി റിപ്പോർട്ട് നൽകാൻ ഹൈക്കോടതി രജിസ്ട്രാർ ജനറലിനോട് നിർദേശിക്കുകയായിരുന്നു. റിപ്പോർട്ടിൽ പറയുന്ന ഇരുനൂറോളം കേസുകളിൽ സുപ്രീംകോടതി എന്തു തീരുമാനമെടുക്കുമെന്നാണ് അറിയാനുള്ളത്.