താനൂരിലെ പെൺകുട്ടികളുടെ രഹസ്യമൊഴിയെടുത്തു; നാടുവിടാന്‍ സഹായിച്ച ഇൻസ്റ്റാഗ്രാം സുഹൃത്ത് എടവണ്ണ സ്വദേശി റഹീം അസ്ലം കസ്റ്റഡിയിൽ

മലപ്പുറം : താനൂരില്‍ നിന്ന് കാണാതായ പ്ലസ് വണ്‍ വിദ്യാർത്ഥിനികളുമായി പോലീസ് സംഘം നാട്ടിലെത്തി. തിരൂര്‍ മജിസ്‌ട്രേറ്റിന് മുന്നില്‍ ഹാജരാക്കിയ ശേഷം ഇവരെ പെണ്‍കുട്ടികളുടെ രഹസ്യമൊഴി രേഖപ്പെടുത്തി. കുട്ടികളെ നാടുവിടാന്‍ സഹായിച്ച ഇൻസ്റ്റാഗ്രാം സുഹൃത്ത് എടവണ്ണ സ്വദേശി റഹീം അസ്ലമിനെ പോലീസ് കസ്റ്റഡിയില്‍ എടുത്തു. ഗരീബ് രഥ് എക്‌സപ്രസില്‍ ശനിയാഴ്ച ഉച്ചയ്ക്ക് 12 മണിയോടെയാണ് പെണ്‍കുട്ടികളെ പൂനെയിൽ നിന്ന് തിരൂരിലെത്തിച്ചത്. കൗണ്‍സിലിങ്ങിന് ശേഷം വീട്ടുകാര്‍ക്കൊപ്പം വിടും. കുട്ടികള്‍ പോകാനുള്ള കാരണമെന്താണ്, കുട്ടികള്‍ക്ക് പണം കിട്ടിയതെവിടെനിന്ന് എന്നീകാര്യങ്ങളിലാണ് പോലീസ് അന്വേഷണം നടത്തുന്നത്.

നേരത്തെ തന്നെ നാട്ടിലേക്ക് പുറപ്പെട്ടിരുന്ന റഹീം അസ്ലമിനെ ഇന്ന് രാവിലെയോടെയാണ് കസ്റ്റഡിയില്‍ എടുത്തത്. താനൂര്‍ ഡിവൈഎസ്പിയുടെ നേതൃത്വത്തില്‍ യുവാവിനെ വിശദമായി ചോദ്യം ചെയ്തുവരികയാണ്.യുവാവിനെ കേന്ദ്രീകരിച്ചുള്ള അന്വേഷണത്തിലായിരുന്നു പെണ്‍കുട്ടികള്‍ മുംബൈയിലേക്ക് കടന്നുകളഞ്ഞവിവരം വ്യക്തമായത്.

ബുധനാഴ്ച ഉച്ചയ്ക്ക് പരീക്ഷയ്ക്കായി സ്‌കൂളിലേക്ക് പോയ പെണ്‍കുട്ടികളെ കാണാതാവുകയായിരുന്നു. സിസിടിവി ദൃശ്യങ്ങളും ടവര്‍ ലൊക്കേഷനും കേന്ദ്രീകരിച്ച് പോലീസ് നടത്തിയ തിരച്ചിലിലാണ് കുട്ടികള്‍ മുംബൈയിലേക്ക് കടന്നതായി കണ്ടെത്തിയത്. അവിടെനിന്ന് ചെന്നൈ എഗ്മോര്‍ എക്‌സ്പ്രസില്‍ യാത്രചെയ്യുമ്പോഴാണ് പുണെയ്ക്കടുത്ത് ലോനാവാലയില്‍വെച്ച് പെണ്‍കുട്ടികളെ ആര്‍.പി.എഫ്. കണ്ടെത്തിയത്.