ജമ്മുവിൽ രണ്ട് ഭീകരരെ കൂടി വധിച്ച് സുരക്ഷാ സേന ; ആയുധങ്ങളും വെടിക്കോപ്പുകളും കണ്ടെടുത്തു

ശ്രീന​ഗർ : ജമ്മുവിൽ രണ്ട് ഭീകരരെ കൂടി വധിച്ച് സുരക്ഷാ സേന. ദോഡ ജില്ലയിൽ സുരക്ഷാ സേനയുമായുണ്ടായ ഏറ്റുമുട്ടലിലാണ് രണ്ട് ഭീകരരെ കൂടി സുരക്ഷാ സേന വകവരുത്തിയത്. ഭീകരരിൽ നിന്നും ആയുധങ്ങളും വെടിക്കോപ്പുകളും കണ്ടെടുത്തിട്ടുണ്ട്. രണ്ട് എം-4, ഒരു എകെ-47 റൈഫിൾ, ​ഗ്രനൈഡ് തുടങ്ങിയവയാണ് ഭീകരരിൽ നിന്നും കണ്ടെടുത്തത്.

ഏറ്റുമുട്ടലിൽ ഒരു പൊലീസ് ഉദ്യോ​ഗസ്ഥന് പരിക്കേറ്റു. പരിക്കേറ്റ സ്‌പെഷ്യൽ പോലീസ് ഓഫീസർ, ദോഡയിലെ സർക്കാർ മെഡിക്കൽ കോളേജിൽ ചികിത്സയിലാണ്. അതേസമയം, പ്രദേശത്ത് തിരച്ചിൽ പുരോ​ഗമിക്കുകയാണ്. ദോഡ ജില്ലയിലെ വനമേഖലയിലാണ് ഏറ്റുമുട്ടലുണ്ടായത്. അതിനാൽ തന്നെ വനത്തിനുള്ളിൽ കൂടുതൽ ഭീകരർ ഒളിച്ചിരിപ്പുണ്ടോയെന്നാണ് സേന ഇപ്പോൾ പരിശോധിക്കുന്നത്. സിന്നോ വനത്തിനുള്ളിൽ ഭീകര സാന്നിധ്യമുണ്ടെന്ന രഹസ്യ വിവരത്തെ തുടർന്നാണ് സുരക്ഷാ സേനയും പൊലീസും സൈന്യവും സംയുക്തമായി തെരച്ചിൽ ആരംഭിച്ചത്. തുടർന്ന് ഇന്നലെ രാവിലെ ഒൻപത് മണി മുതലാണ് വെടിവയ്പ്പ് തുടങ്ങിയത്. വൈകുന്നേരത്തോടെ ഒരു ഭീകരനെ വധിച്ചതായി സേന അറിയിച്ചിരുന്നു.