ഡോണൾഡ് ട്രമ്പിന് തിരിച്ചടി; ഇറാനിൽ തുടർ യുദ്ധം അവസാനിപ്പിക്കുന്ന പ്രമേയം പാസാക്കി യുഎസ് സെനറ്റ് ; പ്രസിഡന്റിന്റെ യുദ്ധാധികാരങ്ങൾക്ക് കടുത്ത നിയന്ത്രണം

ഇറാനെതിരെയുള്ള തുടർ സൈനിക നടപടികൾ അവസാനിപ്പിക്കാൻ പ്രസിഡന്റ് ഡോണൾഡ് ട്രമ്പിനോട് ആവശ്യപ്പെടുന്ന നിർണായക പ്രമേയം യുഎസ് സെനറ്റ് പാസാക്കി. പ്രസിഡന്റിന്റെ യുദ്ധാധികാരങ്ങൾക്ക് കടുത്ത നിയന്ത്രണം ഏർപ്പെടുത്തുന്ന പ്രമേയം 48-നെതിരെ 50 വോട്ടുകൾക്കാണ് സെനറ്റ് അനുമതി നൽകിയത്. ഈ മാസം ആദ്യം ജനപ്രതിനിധി സഭയായ ഹൗസ് ഓഫ് റെപ്രസെന്റേറ്റീവ്സ് പാസാക്കിയ പ്രമേയമാണ് ഇപ്പോൾ സെനറ്റിലും വിജയം കണ്ടത്.

കോൺഗ്രസിന്റെ വ്യക്തമായ അനുമതിയില്ലാതെ ഇറാനെതിരെ തുടർ സൈനിക നടപടികളുമായി മുന്നോട്ട് പോകരുതെന്ന് പ്രമേയം വ്യക്തമാക്കുന്നു.
തുടർച്ചയായ സൈനിക നീക്കങ്ങൾ ആഗോള ഊർജ്ജ വിപണിയെയും സാമ്പത്തിക രംഗത്തെയും ബാധിച്ച പശ്ചാത്തലത്തിലാണ് ഭരണകക്ഷിയായ റിപ്പബ്ലിക്കൻ പാർട്ടിയിലെ ചില അംഗങ്ങൾ പോലും ട്രമ്പിനെതിരെ വോട്ട് ചെയ്തത്. എന്നാൽ ഈ സംയുക്ത പ്രമേയത്തിന്മേൽ നിയമപരമായ തർക്കങ്ങൾ നിലനിൽക്കുന്നുണ്ട്. 1973-ലെ വാർ പവേഴ്സ് ആക്ട് പ്രകാരം പാസാക്കിയ ഈ പ്രമേയം ഒപ്പുവെക്കുന്നതിനായി പ്രസിഡന്റിന്റെ പക്കലേക്ക് അയക്കേണ്ടതില്ല എന്നതിനാൽ ഇത് കേവലം പ്രതീകാത്മകം മാത്രമാണെന്നാണ് വൈറ്റ് ഹൗസിന്റെ നിലപാട്.

ഇറാനുമായി സമാധാന കരാറിനായുള്ള നയതന്ത്ര ചർച്ചകൾ പുരോഗമിക്കുന്ന ഘട്ടത്തിൽ പ്രസിഡന്റിന്റെ അധികാരങ്ങൾ പരിമിതപ്പെടുത്തുന്നത് രാജ്യത്തിന്റെ നിലപാടുകളെ ദുർബലപ്പെടുത്തുമെന്ന് ട്രമ്പ് അനുകൂലികൾ വാദിക്കുന്നു. അതേസമയം, പാർലമെന്റിന്റെ അനുമതിയില്ലാതെ യുദ്ധവുമായി മുന്നോട്ട് പോകുന്നത് ഭരണഘടനാ വിരുദ്ധമാണെന്നാണ് ഡെമോക്രാറ്റുകളുടെ പക്ഷം. വരും ദിവസങ്ങളിൽ ഈ വിഷയം യുഎസ് കോടതികളുടെ പരിഗണനയ്ക്ക് വരാനാണ് സാധ്യത.