ലൈംഗികാതിക്രമക്കേസ് !മുകേഷിനെ സംസ്ഥാന സർക്കാർ സംരക്ഷിക്കുന്നുവെന്നാരോപിച്ച് പരാതിക്കാരി; തനിയെ അപ്പീൽ പോകാൻ തീരുമാനിച്ചിട്ടുണ്ടെന്നും നടി

ലൈംഗികാതിക്രമക്കേസിൽ നടനും കൊല്ലം എംഎൽഎയുമായ മുകേഷിനെ സംസ്ഥാന സർക്കാർ സംരക്ഷിക്കുന്നുവെന്ന് പരാതിക്കാരി. എംഎൽഎയും നടനുമായ മുകേഷിനെ ചോദ്യം ചെയ്യാത്തതിൽ പ്രതിഷേധമുണ്ടെന്നും പരാതിക്കാരിയായ നടി വ്യക്തമാക്കി. കേസിൽ മുകേഷിന് മുൻ‌കൂർ ജാമ്യം ലഭിച്ചതിനെതിരെ അന്വേഷണ സംഘം അപ്പീൽ പോകുമെന്ന് അറിയിച്ചുരുന്നെങ്കിലും പിന്നീട് അതിൽ നിന്നും പിന്മാറുകയാണ് ഉണ്ടായത്.

‘മുകേഷിനെ ഇന്നുവരെ കസ്റ്റഡിയിലെടുത്ത് ചോദ്യം ചെയ്തിട്ടില്ല. ആരാണ് പുള്ളിക്കാരനെ ഇപ്പോഴും സംരക്ഷിക്കുന്നത്. മ്യൂച്വൽ ആക്കുവാനാണ് ആളുകൾ ശ്രമിക്കുന്നത്. ഞാൻ തനിയെ അപ്പീൽ പോകാൻ തീരുമാനിച്ചിട്ടുണ്ട്. ഒരു ഓപ്പൺ മൊഴി എനിക്ക് കോടതിയോട് പറയേണ്ടതായിട്ടുണ്ട്. കോടതിയെയാണ് വിശ്വാസം. കോടതി ഇടപെട്ടുകഴിഞ്ഞാൽ ഒരു സ്വാധീനം ചെലുത്തലും നടക്കില്ലെന്നാണ് എൻ്റെ വിശ്വാസം’, പരാതിക്കാരി പറഞ്ഞു.

മരടിൽവെച്ച് മുകേഷ് ലൈംഗികാതിക്രമം നടത്തിയെന്നാണ് നടിയുടെ ആരോപണം. പരാതിക്കാരിയുടെ രഹസ്യമൊഴിയുടെ അടിസ്ഥാനത്തിൽ മുകേഷിന്റെ വില്ലയിലും നേരത്തെ പ്രത്യേക അന്വേഷണ സംഘം പരിശോധന നടത്തിയിരുന്നു.