പ്ലസ് ടു വിദ്യാർത്ഥിനിക്ക് നേരെ ലൈംഗികാതിക്രമം! പൂജപ്പുരയിൽ ട്യൂഷൻ സെന്റർ ഉടമ അറസ്റ്റിൽ

തിരുവനന്തപുരം : ട്യൂഷൻ സെന്ററിൽ വെച്ച് പ്ലസ് ടു വിദ്യാർത്ഥിനിയെ ലൈംഗികമായി ഉപദ്രവിച്ച അദ്ധ്യാപകനെ പോലീസ് അറസ്റ്റ് ചെയ്തു. കരിക്കകം സ്വദേശിയായ സുബിൻ സ്റ്റെല്ലസാണ് (42) പൂജപ്പുര പോലീസിന്റെ പിടിയിലായത്. കഴിഞ്ഞ നാല് വർഷമായി പൂജപ്പുരയിൽ ട്യൂഷൻ സെന്റർ നടത്തിവരികയായിരുന്നു ഇയാൾ. പതിനേഴുകാരിയായ വിദ്യാർത്ഥിനിയുടെ പരാതിയിൽ പോക്സോ നിയമപ്രകാരമുള്ള കടുത്ത വകുപ്പുകൾ ചുമത്തിയാണ് ഇയാൾക്കെതിരെ കേസെടുത്തിരിക്കുന്നത്.

കഴിഞ്ഞ ഡിസംബർ 31-നാണ് കേസിനാസ്പദമായ സംഭവം നടന്നത്. ക്ലാസുകൾ കഴിഞ്ഞ് മറ്റ് കുട്ടികൾ പോയതിനുശേഷം, പഠനവുമായി ബന്ധപ്പെട്ട സംശയങ്ങൾ ചോദിക്കാനായി എത്തിയ പെൺകുട്ടിയെ പ്രതി ലൈംഗികമായി ഉപദ്രവിക്കുകയായിരുന്നു എന്നാണ് പരാതി. ക്രൂരമായ പെരുമാറ്റത്തെത്തുടർന്ന് ഭയന്നുപോയ പെൺകുട്ടി വീട്ടിലെത്തിയ ഉടൻ മാതാപിതാക്കളെ വിവരം അറിയിച്ചു. തുടർന്ന് രക്ഷിതാക്കൾ പൂജപ്പുര പോലീസ് സ്റ്റേഷനിലെത്തി പരാതി നൽകുകയായിരുന്നു.

സംഭവത്തിൽ പെൺകുട്ടിയുടെ വിശദമായ മൊഴി രേഖപ്പെടുത്തിയ പോലീസ് ഉടൻ തന്നെ പ്രതിയെ കസ്റ്റഡിയിലെടുത്തു. കോടതിയിൽ ഹാജരാക്കിയ പ്രതിയെ നിലവിൽ റിമാൻഡ് ചെയ്തിരിക്കുകയാണ്. അദ്ധ്യാപകനെന്ന നിലയിലുള്ള വിശ്വാസത്തെ ചൂഷണം ചെയ്ത പ്രതിക്കെതിരെ കർശന നടപടി വേണമെന്നാണ് നാട്ടുകാരുടെ ആവശ്യം.