ഭാരത് രാഷ്ട്ര സമിതി എംഎൽഎയ്‌ക്കെതിരായ ‘ഷണ്ഡ’ പരാമർശം; യുവജന ശ്രമിക റൈതു തെലങ്കാന പാർട്ടി അദ്ധ്യക്ഷ ഷർമിള പൊലീസ് കസ്റ്റഡിയിൽ

മഹാബുബാബാദ് : ഭാരത് രാഷ്ട്ര സമിതി (ബിആർഎസ്) എംഎൽഎ ബി.ശങ്കർ നായിക്കിനെതിരെ അപകീർത്തി പരാമർശം നടത്തിയത് വിവാദമായതോടെ യുവജന ശ്രമിക റൈതു തെലങ്കാന പാർട്ടി (വൈഎസ്ആർടിപി) അധ്യക്ഷയും ആന്ധ്ര പ്രദേശ് മുൻ മുഖ്യമന്ത്രി വൈ.എസ്. രാജശേഖര റെഡ്ഡിയുടെ മകളും ഇപ്പോഴത്തെ ആന്ധ്ര മുഖ്യമന്ത്രി വൈ.എസ്. ജഗൻ മോഹൻ റെഡ്ഡിയുടെ സഹോദരിയുമായ വൈ.എസ്. ഷർമിളയെ പോലീസ് കസ്റ്റഡിയിലെടുത്തു. ഐപിസി 504 വകുപ്പ് പ്രകാരമാണ് ഇവർക്കെതിരെ കേസ് എടുത്തിരിക്കുന്നത്.

മഹാബുബാബാദിൽ നടന്ന പൊതു യോഗത്തിൽ വച്ചാണ് ആവേശം നിയന്ത്രിക്കാനാകാതെ ശങ്കർ നായിക്കിനെതിരെ ഷർമിള പറഞ്ഞ കാര്യങ്ങൾ അതിർവരമ്പ് ലംഘിച്ചത് . ‘‘നിങ്ങൾ ജനങ്ങൾക്ക് അനേകം വാഗ്ദാനങ്ങൾ നൽകി. പക്ഷേ, ഒന്നും യാഥാർഥ്യമായില്ല. നിങ്ങൾ നൽകുന്ന വാഗ്ദാനങ്ങൾ യാഥാർഥ്യമായില്ലെങ്കിൽ മനസ്സിലാകുന്നത് നിങ്ങളൊരു ഷണ്ഡനാണെന്നാണ്’’ –എന്നായിരുന്നു ഷർമിളയുടെ പരാമർശം. പരാമർശം വിവാദമായതോടെ വൻ പ്രതിഷേധമാണ് ഷർമിളയ്ക്കെതിരെ ഉയർന്നത്.