ദില്ലിയിലെ ശ്രദ്ധ കൊലക്കേസ്: ഡിഎൻഎ ഫലം പുറത്ത്; വനത്തിൽ നിന്നും കിട്ടിയ എല്ലുകളും മുടിയും ശ്രദ്ധയുടേത് തന്നെ

ദില്ലി : ദില്ലിയിലെ ശ്രദ്ധ വാൽക്കർ കൊലക്കേസിൽ ഡിഎൻഎ ഫലം പുറത്ത്. ദില്ലിയിലെ വനത്തിൽ നിന്നു കണ്ടെത്തിയ മൃതദേഹാവശിഷ്ടങ്ങൾ കൊല്ലപ്പെട്ട ശ്രദ്ധ വാൽക്കറുടേതാണെന്ന് തെളിഞ്ഞു. ഗുഡ്ഗാവ്, മെഹ്‌റൗളി ഉൾപ്പെടുന്ന വനത്തിൽ നിന്നാണ് ശ്രദ്ധയുടെ എല്ലുകളും മുടിയും കണ്ടെത്തിയത്. മൃതദേഹാവശിഷ്ടങ്ങൾ ഡിഎൻഎ വേർതിരിച്ചെടുക്കാൻ കഴിയാത്ത നിലയിലായതിനാൽ ഡിഎൻഎ മൈറ്റോകോൺട്രിയൽ പ്രൊഫൈലിങ്ങിനായി ഹൈദരാബാദിലേക്ക് അയച്ചിരുന്നു. ഇതു ശ്രദ്ധയുടെ പിതാവിന്റെയും സഹോദരന്റെയും സാംപിളുമായി പൊരുത്തപ്പെട്ടതായി ദില്ലി സ്പെഷൽ കമ്മിഷണർ സാഗർ പ്രീത് ഹോഡ അറിയിച്ചു.

ദില്ലിയിലെ മെഹ്റോളിയിൽ കഴിഞ്ഞ മേയ് 18നാണ് രാജ്യത്തെ ഞെട്ടിച്ച കൊലപാതകം നടന്നത്. പങ്കാളി അഫ്‌താബ് അമീൻ പൂനവാല (28) ശ്രദ്ധയെ വെട്ടിക്കൊലപ്പെടുത്തി ശരീരത്തെ കഷണങ്ങളാക്കി മാറ്റുകയായിരുന്നു.തുടർന്ന് 3 ആഴ്ച റഫ്രിജറേറ്ററിൽ സൂക്ഷിച്ച ശരീരഭാഗങ്ങൾ 18 ദിവസം കൊണ്ടാണു നഗരത്തിൽ പല ഭാഗങ്ങളിലായി ഉപേക്ഷിച്ചത്. മകളെ തട്ടിക്കൊണ്ടു പോയതായി കാട്ടി ശ്രദ്ധയുടെ പിതാവ് വികാശ് മദൻ വാൽക്കർ നൽകിയ പരാതിയിലാണ് ഡൽഹി പൊലീസ് അഫ്‌താബ് അമീൻ പൂനവാലയെ അറസ്റ്റ് ചെയ്‌തത്. ഇയാൾ ഇപ്പോൾ ജയിലിലാണ്.

മുംബൈയിലെ കോൾ സെന്ററിൽ ജോലി ചെയ്യുമ്പോഴാണു ശ്രദ്ധയും അഫ്താബും പ്രണയത്തിലാകുന്നത്. കുടുംബങ്ങൾ ഇവരുടെ ബന്ധം അംഗീകരിക്കാതെ വന്നതോടെ കഴിഞ്ഞ വർഷം ജനുവരിയോടെ ഇവർ ഡൽഹിയിലേക്കു താമസം മാറുകയായിരുന്നു.