എസ്എന്‍ കോളജ് ജൂബിലി ഫണ്ട് തിരിമറിക്കേസ്; വെള്ളാപ്പള്ളിക്ക് താത്കാലികാശ്വാസം; കേസിൽ വിചാരണ തുടരാമെന്ന ഹൈക്കോടതി ഉത്തരവിന് സുപ്രീംകോടതിയുടെ സ്റ്റേ

ദില്ലി : എസ്എന്‍ കോളജ് ജൂബിലി ഫണ്ട് തിരിമറിക്കേസില്‍ എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശന് താത്കാലികാശ്വാസം. കേസിൽ വിചാരണ തുടരാമെന്ന ഹൈക്കോടതി ഉത്തരവ് സുപ്രീംകോടതി സ്റ്റേ ചെയ്തു. ജസ്റ്റിസ് ഋഷികേശ് റോയ് അദ്ധ്യക്ഷനായ ബെഞ്ചാണ് ഹൈക്കോടതി ഉത്തരവ് സ്റ്റേ ചെയ്തത്.

എതിര്‍കക്ഷികള്‍ക്ക് സുപ്രീം കോടതി നോട്ടിസ് അയച്ചു. നേരത്തെ വരുന്ന 20ന് വെള്ളാപ്പള്ളി നടേശനെ നേരിട്ട് ഹാജരാകാൻ കൊല്ലം ചീഫ് ജുഡീഷ്യൽ മജിസ്ട്രേറ്റ് എഫ്.മിനിമോൾ ഉത്തരവിട്ടിരുന്നു. സുപ്രീം കോടതി സ്റ്റേ ഉത്തരവ് പുറപ്പെടുവിച്ചതിനാൽ വെള്ളാപ്പള്ളിക്ക് കോടതിയിൽ ഹാജരാകേണ്ടതില്ല.

1998–99 കാലഘട്ടത്തിൽ എസ്എൻ കോളജ് സുവർണ ജൂബിലി ആഘോഷത്തിന്റെ ഭാഗമായി ജനങ്ങളിൽനിന്ന് പിരിച്ച 55 ലക്ഷം എസ്എൻ ട്രസ്റ്റിലേക്ക് മാറ്റി എന്നാണ് കേസ്. കേസിൽ 2020ൽ ക്രൈംബ്രാഞ്ച് അന്വേഷണം പൂർത്തിയാക്കി കുറ്റപത്രം സമർപ്പിച്ചിരുന്നു. കേസിൽ തുടരന്വേഷണം നടത്താൻ കൊല്ലം സിജെഎം ഉത്തരവിട്ടെങ്കിലും ഹൈക്കോടതി അത് റദ്ദ് ചെയ്യുകയായിരുന്നു. എന്നാൽ കേസ് തുടരേണ്ടതില്ലെന്ന റിപ്പോർട്ട് അംഗീകരിക്കണമെന്ന വെള്ളാപ്പള്ളിയുടെ ആവശ്യവും ഹൈക്കോടതി കഴിഞ്ഞമാസം തള്ളി. ഇതിനെത്തുടർന്നാണ് സുപ്രീംകോടതിയിൽ അപ്പീൽ നൽകിയത്.