വരിഞ്ഞു മുറുക്കി സ്പിന്നർമാർ !മിന്നലാട്ടം നടത്താതെ കിവീസ് ബാറ്റർമാർ; ഇന്ത്യയ്ക്ക് കപ്പിനും ചുണ്ടിനുമിടയിൽ ഇനി 252 റൺസ് ദൂരം

ദുബായ്: സ്പിന്നർമാരുടെ കരുത്തിൽ ചാമ്പ്യന്‍സ് ട്രോഫി ഫൈനലിൽ ആദ്യം ബാറ്റിങ്ങിനിറങ്ങിയ ന്യൂസീലന്‍ഡിനെ ചെറിയ സ്‌കോറില്‍ പിടിച്ചുകെട്ടി ഇന്ത്യ. 50 ഓവറില്‍ ഏഴു വിക്കറ്റ് നഷ്ടത്തില്‍ 251 റണ്‍സാണ് ന്യൂസീലന്‍ഡ് സ്‌കോർ ബോർഡിൽ കൂട്ടിച്ചേർത്തിരിക്കുന്നത്.

സ്പിന്നർമാരായ വരുണ്‍ ചക്രവര്‍ത്തിയും കുൽദീപ് യാദവും രണ്ട് വിക്കറ്റ് വീതം നേടിയപ്പോൾ രവീന്ദ്ര ജഡേജയും മുഹമ്മദ് ഷമിയും ഓരോ വിക്കറ്റ് വീതം വീഴ്ത്തി. കിവീസ് നിരയിൽ ഒരാൾ റൺ ഔട്ട് ആയി. ഡറില്‍ മിച്ചലാണ് (63) ന്യൂസീലന്‍ഡ് നിരയിലെ ടോപ് സ്‌കോറര്‍. മിച്ചൽ ബ്രേസ്വെൽ (40 പന്തിൽ 53*) അർധ സെഞ്ചുറി നേടി പുറത്താവാതെ നിന്നു.

വരുൺ ചക്രവർത്തിയുടെ പന്തിൽ വിൽ യങ് (15) വിക്കറ്റിനുമുന്നിൽ കുരുങ്ങി ആദ്യം മടങ്ങിയത്. 11-ാം ഓവറിൽ കുൽദീപ് യാദവിന്റെ പന്തിൽ രചിൻ രവീന്ദ്ര (29 പന്തിൽ 37) ബൗള്‍ഡായി. തൊട്ടടുത്ത ഓവറിൽ കെയിൻ വില്യംസണെ (14 പന്തിൽ 11) പുറത്താക്കി കുൽദീപ് വിക്കറ്റ് നേട്ടം രണ്ടാക്കി ഉയർത്തി. റിട്ടേൺ വന്ന പന്ത് കുൽദീപ് തന്നെ കൈപ്പിടിയിലൊതുക്കുകയായിരുന്നു.

ടോം ലാഥമിനെ (14) രവീന്ദ്ര ജഡേജ വിക്കറ്റിനു മുന്നിൽ കുരുക്കി. ഗ്ലെൻ ഫിലിപ്സിനെ (52 പന്തിൽ 34) വരുൺ ചക്രവർത്തി മടക്കി. ഒരു വശത്ത് നിലയുറപ്പിച്ച് കളിച്ച ഡറിൽ മിച്ചലിനെ മുഹമ്മദ് ഷമി രോഹിത്തിന്റെ കൈകളിലെത്തിച്ചു. 49-ാം ഓവറിൽ ക്യാപ്റ്റൻ മിച്ചൽ സാന്റ്നർ ഡബിളിനായി ശ്രമിച്ച് റണ്ണൗട്ടായി. ഇന്ത്യ സെമിയില്‍ ഓസ്ട്രേലിയക്കെതിരേ കളിച്ച അതേ ടീമിനെ നിലനിർത്തി. ന്യൂസീലന്‍ഡ് ടീമില്‍ പരിക്കേറ്റ മാറ്റ് ഹെന്റിക്ക് പകരം നഥാന്‍ സ്മിത്തിനെ ഉള്‍പ്പെടുത്തി.