അകക്കണ്ണിലുണ്ട് ശ്രീരാമൻ ! കണ്ണുകെട്ടി അയോദ്ധ്യയിൽ ശ്രീരാമക്ഷേത്രത്തിന്റെ രംഗോളി തീർത്ത് കോളേജ് വിദ്യാർത്ഥിനി

ലക്‌നൗ : കണ്ണുകെട്ടി അയോദ്ധ്യയിൽ ശ്രീരാമക്ഷേത്രത്തിന്റെ രംഗോളി തീർത്ത് കോളേജ് വിദ്യാർത്ഥിനി. അകക്കണ്ണിലെ വെളിച്ചത്താൽ ബീഹാർ ദർഭംഗ സ്വദേശിനിയായ മോണിക ഗുപ്തയാണ് അകക്കണ്ണിലെ വെളിച്ചത്താൽ രംഗോളിയിട്ട് ഏവരെയും അമ്പരപ്പിച്ചത്. രാമക്ഷേത്രവും ക്ഷേത്രം നോക്കി നിൽക്കുന്ന ഭഗവാൻ ശ്രീരാമന്റെയും സീതയുടെയും ചിത്രമാണ് മോണിക വരച്ചത്.

അയോദ്ധ്യ ശ്രീരാമക്ഷേത്രത്തിന്റെ പ്രാണപ്രതിഷ്ഠയുടെ വാർത്തകൾ പത്രമാദ്ധ്യമങ്ങളിലൂടെ അറിഞ്ഞ മോണിക അയോദ്ധ്യയിൽ രംഗോളി തീർക്കണമെന്ന് രക്ഷിതാക്കളോട് ആഗ്രഹം പ്രകടിപ്പിക്കുകയായിരുന്നു. ഇതേ തുടർന്ന് കഴിഞ്ഞ ദിവസമാണ് 450 കിലോമീറ്റർ താണ്ടിമോണികയും കുടുംബവും അയോദ്ധ്യയിൽ എത്തിച്ചേർന്നത്. തുടർന്ന് തീർത്ഥ ക്ഷേത്ര ട്രസ്റ്റ് അംഗങ്ങളുടെ സഹായത്താൽ ക്ഷേത്രത്തിന് സമീപം രംഗോളി തീർക്കുകയായിരുന്നു. കറുത്ത തുണി കൊണ്ട് കണ്ണുകെട്ടിയായിരുന്നു മോണിക രംഗോളിയിട്ടത്. മോണികയുടെ അത്ഭുത പ്രകടനം കാണാൻ നിരവധി പേരാണ് തടിച്ച് കൂടിയത്.

എംഎസ്‌സി കെമിസ്ട്രി വിദ്യാർത്ഥിനിയായ മോണിക നാലാം വയസ്സു മുതൽ കണ്ണുകെട്ടി രംഗോളി ഇടുന്ന വിദ്യ പരിശീലിച്ചുവരികയാണ്. മഹാഭാരത കഥയാണ് ഇതിനായി തന്നെ സ്വാധീനിച്ചത് എന്നാണ് മോണിക പറയുന്നത്. രണ്ട് വയസ്സുമുതൽ തന്നെ മോണിക മഹാഭാരത കഥകളിൽ താത്പര്യം പ്രകടിപ്പിച്ചിരുന്നു. ഇതിൽ കുരുക്ഷേത്ര യുദ്ധം ധൃതരാഷ്ട്രർക്ക് വിവരിച്ച് നൽകുന്ന സജ്ഞയന്റെ കഥ തന്നെ വളരെയധികം സ്വാധീനിച്ചു. ഇതിൽ നിന്നാണ് കണ്ണുകെട്ടി രംഗോളിയിടാൻ ആരംഭിച്ചതെന്നാണ് മോണിക പറയുന്നത്.