ദുർഗ്ഗാ വിഗ്രഹ നിമജ്ജന ഘോഷയാത്രക്ക് നേരെ കല്ലേറും മുട്ടയെറിയലും!! ഹൈദരാബാദിൽ സംഘർഷാവസ്ഥ, പോലീസ് കേസെടുത്തു

ഹൈദരാബാദ്: ദുർഗ്ഗാ വിഗ്രഹ നിമജ്ജന ഘോഷയാത്രക്ക് നേരെ ചിലർ മുട്ടയും കല്ലുകളും എറിഞ്ഞതിനെ തുടർന്ന് ഹൈദരാബാദിലെ ചാദർഘട്ടിൽ സംഘർഷാവസ്ഥ . പ്രദേശത്ത് ഉടനടി പോലീസ് നിയന്ത്രണം ഏർപ്പെടുത്തുകയും സ്ഥിതിഗതികൾ ശാന്തമാക്കുകയും ചെയ്തു.

ശനിയാഴ്ച അർദ്ധരാത്രിയാണ് സംഭവം. ഹുസൈൻസാഗറിലേക്ക് കൊണ്ടുപോകുകയായിരുന്ന ദുർഗ്ഗാ വിഗ്രഹ ഘോഷയാത്ര അക്ബർബാഗ് പ്രദേശത്ത് കൂടി കടന്നുപോകുമ്പോളാണ് ഘോഷയാത്രക്കാർക്ക് നേരെ ആക്രമണം ഉണ്ടായത്. ഘോഷയാത്രയുടെ ഭാഗമായി വന്നവർക്ക് നേരെ ചിലർ മുട്ടയെറിഞ്ഞതായി സംഘാടകർ പോലീസിൽ പരാതിപ്പെട്ടു.ഇതോടെ ഘോഷയാത്ര നിർത്തിവെക്കുകയും, സംഘാടകർ പ്രദേശത്ത് മുദ്രാവാക്യങ്ങൾ വിളിച്ച് പ്രതിഷേധിക്കുകയും ചെയ്തത് താത്കാലികമായി സംഘർഷാവസ്ഥ സൃഷ്ടിച്ചു. സ്ഥിതിഗതികൾ കൈവിട്ട് പോകാനുള്ള സാധ്യത മുന്നിൽ കണ്ട് മുതിർന്ന പോലീസ് ഉദ്യോഗസ്ഥർ കൂടുതൽ സേനാംഗങ്ങളുമായി സ്ഥലത്തേക്ക് കുതിച്ചെത്തി. റാപ്പിഡ് ആക്ഷൻ ഫോഴ്സ് (RAF), കമ്മീഷണറുടെ ടാസ്ക് ഫോഴ്സ് ടീമുകൾ എന്നിവരെയും ഉടൻ സ്ഥലത്ത് വിന്യസിച്ചു.

മുട്ടയെറിഞ്ഞതായി പറയപ്പെടുന്ന അപ്പാർട്ട്മെന്റ് കെട്ടിടത്തിലേക്കുള്ള പ്രവേശനം സുരക്ഷാ ഉദ്യോഗസ്ഥർ തടയുകയും പുറത്തുനിന്നുള്ളവർക്ക് പ്രദേശത്തേക്ക് പ്രവേശിക്കാൻ അനുമതി നിഷേധിക്കുകയും ചെയ്തു. പോലീസ് സംഘം കെട്ടിടത്തിനുള്ളിൽ പ്രവേശിച്ച് താമസക്കാരെ പരിശോധിച്ചെങ്കിലും പുറത്തുനിന്നുള്ള ആരെയും കണ്ടെത്താൻ കഴിഞ്ഞില്ല.

പ്രതിഷേധം നടത്തിയവരുമായി സംസാരിച്ച പോലീസ് ഉദ്യോഗസ്ഥർ, അന്വേഷണം തുടരാമെന്ന് ഉറപ്പ് നൽകിയ ശേഷം ഘോഷയാത്ര തുടർന്ന് പോകാൻ അവരോട് ആവശ്യപ്പെട്ടു. തുടർന്ന്, കനത്ത പോലീസ് സംരക്ഷണയിൽ ഘോഷയാത്ര ഹുസൈൻസാഗറിലേക്ക് നീങ്ങി. സംഭവത്തിന് പിന്നാലെ നഗരത്തിലെ മതപരമായ അതിർത്തികളിൽ അതീവ ജാഗ്രത പ്രഖ്യാപിച്ചിട്ടുണ്ട്.

സ്ഥിതിഗതികൾ ഇപ്പോൾ ശാന്തമാണെന്ന് ഡി.സി.പി (സൗത്ത് ഈസ്റ്റ്) എസ്. ചൈതന്യ കുമാർ ‘തെലങ്കാന ടുഡേ’യോട് പ്രതികരിച്ചു. “ചാദർഘട്ട് പോലീസ് സ്റ്റേഷനിൽ കേസെടുത്തിട്ടുണ്ട്. സ്ഥിതി ശാന്തമാണ്, അന്വേഷണം നടക്കുകയാണ്,” അദ്ദേഹം പറഞ്ഞു. കേസ് അന്വേഷണത്തിനായി മൂന്ന് പോലീസ് ടീമുകൾ പ്രവർത്തിക്കുന്നുണ്ടെന്നും അദ്ദേഹം കൂട്ടിച്ചേർത്തു