കർണാടകയിൽ 83.61% പേർക്കും ഇവിഎമ്മിൽ വിശ്വാസമെന്ന് സർവേഫലം ! രാഹുലിന്റെ വോട്ട് ചോരിയെ തള്ളി ജനങ്ങൾ ; കോൺഗ്രസിന്റെ മുഖത്തേറ്റ അടിയെന്ന് ബിജെപി

ബെംഗളൂരു : ഇലക്ട്രോണിക് വോട്ടിങ് മെഷീനുകൾ വിശ്വാസയോഗ്യമെന്ന് കർണാടകയിലെ സർവ്വേ റിപ്പോർട്ട്. 2024-ലെ ലോക്‌സഭാ തെരഞ്ഞെടുപ്പിന് ശേഷം ‘നോളജ്, ആറ്റിറ്റ്യൂഡ് ആൻഡ് പ്രാക്ടീസ്’ (KAP) സർവേ ഫലമാണ് ഇപ്പോൾ പുറത്തു വന്നിരിക്കുന്നത്. സർവേയിൽ പങ്കെടുത്ത 83.61 ശതമാനം ആളുകളും ഇവിഎമ്മുകൾ വിശ്വസനീയമാണെന്ന് അഭിപ്രായപ്പെട്ടു. ഇവിഎമ്മുകൾ കൃത്യമായ ഫലം നൽകുന്നുവെന്ന് 69.39 ശതമാനം പേർ വിശ്വസിക്കുമ്പോൾ, 14.22 ശതമാനം പേർ ഈ കാര്യത്തിൽ ഉറച്ച വിശ്വാസം രേഖപ്പെടുത്തി. 5,100 പേരെ പങ്കെടുപ്പിച്ച് കർണാടകയിലെ നാല് അഡ്മിനിസ്‌ട്രേറ്റീവ് ഡിവിഷനുകളിലായി നടത്തിയ സർവേയിലാണ് വോട്ടിംഗ് മെഷീനുകൾക്ക് അനുകൂലമായ ഈ ഫലം ലഭിച്ചത്.

ഇവിഎമ്മുകളുടെ വിശ്വാസ്യതയെ നിരന്തരം ചോദ്യം ചെയ്യുന്ന രാഹുൽ ഗാന്ധിക്കേറ്റ തിരിച്ചടിയാണ് ഈ സർവേ ഫലമെന്ന് ബിജെപി ആഞ്ഞടിച്ചു. ജനാധിപത്യം അപകടത്തിലാണെന്നും ഇവിഎമ്മുകൾ വഴി വോട്ടുകൾ മോഷ്ടിക്കപ്പെടുന്നുവെന്നും ആരോപിച്ച് രാഹുൽ രാജ്യം മുഴുവൻ സഞ്ചരിക്കുകയാണെന്നും, എന്നാൽ കർണാടകയിലെ ജനങ്ങൾ അതിന് കൃത്യമായ മറുപടി നൽകിക്കഴിഞ്ഞുവെന്നും ബിജെപി നേതാവ് ആർ. അശോക് വ്യക്തമാക്കി. ജനങ്ങൾക്ക് തെരഞ്ഞെടുപ്പ് പ്രക്രിയയിലും ഇവിഎമ്മിലും പൂർണ്ണ വിശ്വാസമുണ്ടെന്നും ഇത് കോൺഗ്രസിൻ്റെ മുഖത്തേറ്റ അടിയാണെന്നും ബിജെപി പരിഹസിച്ചു.