സന്തോഷ് ട്രോഫിയിൽ കേരളത്തിന് കണ്ണീർ …പഞ്ചാബിനോടു സമനിലവഴങ്ങി നിലവിലെ ചാമ്പ്യന്മാരായ കേരളം സെമി കാണാതെ പുറത്ത്

ഭുവനേശ്വര്‍ : കേരള ഫുട്ബോളിന് ഇന്ന് കണ്ണുനീരിന്റെ ദിനം. കിരീടം നിലനിർത്താൻ ജയം മാത്രം ലക്ഷ്യമിട്ടിറങ്ങിയ നിലവിലെ ചാംപ്യൻമാരായ കേരളം പുറത്തായി. ഗ്രൂപ്പ് ഘട്ടത്തിലെ അവസാന പോരാട്ടത്തിൽ പഞ്ചാബിനോടു 1 -1 നു സമനില വഴങ്ങിയതോടെയാണു കേരളത്തിന്റെ സാദ്ധ്യതകൾ അവസാനിച്ചത്. മത്സരത്തിന്റെ 24–ാം മിനിറ്റിൽ വൈശാഖ് മോഹൻ വല കുലുക്കിയതോടെ കേരളം മുന്നിലെത്തിയിരുന്നു.

എന്നാൽ 39–ാം മിനിറ്റിൽ രോഹിത് ഷെയ്ഖിലൂടെ പഞ്ചാബ് മറുപടി ഗോൾ നേടി. പിന്നീട് ഗോൾ നേടാനുള്ള കേരളത്തിന്റെ എല്ലാ ശ്രമങ്ങളും നിഷ്പ്രഭമായതോടെ മത്സരം സമനിലയിൽ അവസാനിക്കുകയായിരുന്നു.

ഗ്രൂപ്പിലെ ആദ്യ രണ്ടു സ്ഥാനക്കാർക്കാണു സെമി യോഗ്യത. ഗ്രൂപ്പ് ചാംപ്യൻമാരായ പഞ്ചാബിന് 11 പോയിന്റുണ്ട്.പഞ്ചാബിനൊപ്പം കർണാടക സെമി ഫൈനൽ ഉറപ്പിച്ചു. കർണാടകയ്ക്ക് ഒൻപതു പോയിന്റുണ്ട് .കേരളത്തിന് എട്ട് പോയിന്റ് മാത്രമേയുള്ളു.