കേരളത്തിന്റെ ചരിത്രത്തിലെ ഏറ്റവും വലിയ നികുതി വെട്ടിപ്പ് കണ്ടെത്തിയിട്ടും കാര്യം പരമരഹസ്യമാക്കി വച്ച് സംസ്ഥാന ജി എസ് ടി വകുപ്പ്; കമ്പനിയുടെ അക്കൗണ്ടുകൾ മരവിപ്പിക്കാതെ ഒത്തുകളി; നികുതി വെട്ടിപ്പുകാർക്ക് എല്ലാവിധ ഒത്താശയും നൽകി സർക്കാർ ?

തിരുവനന്തപുരം: കേരളം കണ്ട ഏറ്റവും വലിയ ജി എസ് ടി വെട്ടിപ്പ് കണ്ടെത്തിയിട്ടും കുറ്റക്കാരായ സ്വകാര്യ കമ്പനിയുമായി ഒത്തുകളിച്ച് സംസ്ഥാന ജി എസ് ടി വകുപ്പ്. തൃശ്ശൂർ ആസ്ഥാനമാക്കി പ്രവർത്തിക്കുന്ന ഹൈറിച്ച് ഓൺലൈൻ സ്റ്റോർ പ്രൈവറ്റ് ലിമിറ്റഡ് എന്ന കമ്പനിയെയാണ് വൻ നികുതി വെട്ടിപ്പിന് പിടികൂടിയത്. 126 കോടിയുടെ വെട്ടിപ്പാണ് നടത്തിയത്. 780 കോടിയുടെ വിറ്റുവരവിലാണ് തട്ടിപ്പ് നടത്തിയത്. കമ്പനിയുടെ എം ഡി, കെ ഡി പ്രഭാകരൻ അറസ്റ്റിലായിട്ടും വിഷയം രഹസ്യമാക്കിവച്ച് തുടർനടപടികൾ ജി എസ് ടി വകുപ്പ് തട്ടിപ്പുകാരുടെ ഒത്തുകളിച്ച് വൈകിപ്പിക്കുന്നു എന്നാണ് ആരോപണം.

കേസിൽ അറസ്റ്റ് ചെയ്യാതിരിക്കാൻ കമ്പനി 75 കോടിരൂപ നികുതി അടയ്‌ക്കേണ്ടതുണ്ട്. എന്നാൽ ഹൈറിച്ച് 51 കോടിരൂപ മാത്രമേ അടച്ചിട്ടുള്ളു. തുടർന്നാണ് എം ഡി അറസ്റ്റിലായത്. ഇത്തരം കേസ്സുകളിൽ ഉടൻ കമ്പനിയുടെ ബാങ്ക് അക്കൗണ്ടുകൾ മരവിപ്പിക്കാറുണ്ട്. എന്നാൽ ഈ കേസിൽ തുടർനടപടികൾ ജി എസ് ടി വകുപ്പ് വൈകിപ്പിക്കുകയാണ്. ഇത് കമ്പനിക്ക് അക്കൗണ്ടിൽ നിന്ന് പണം പിൻവലിക്കാൻ സൗകര്യമൊരുക്കും. സാധാരണ നികുതി വെട്ടിപ്പുകൾ കണ്ടെത്തിയാൽ ജി എസ് ടി വകുപ്പ് വാർത്താക്കുറിപ്പ് ഇറക്കാറുണ്ട്. എന്നാൽ ഇക്കാര്യം ഉദ്യോഗസ്ഥർ പരമ രഹസ്യമാക്കി വയ്ക്കുകയായിരുന്നു. ഇതാണ് സംശയത്തിന് ഇടയാക്കുന്നത്.

സംസ്ഥാനത്തിന്റെ നികുതി വരുമാനത്തിൽ വൻ ചോർച്ചയുണ്ടെന്ന് ഒന്നിലധികം ഏജൻസികൾ മുന്നറിയിപ്പ് നൽകിയിരുന്നതാണ്. നികുതി വെട്ടിപ്പും,അഴിമതിയും സംസ്ഥാനത്ത് വ്യാപകമാകുന്നു എന്നതിന്റെ സൂചനയാണിത്. ഈ അവസരത്തിലാണ് വൻ നികുതി വെട്ടിപ്പ് സംബന്ധിച്ച വാർത്ത പുറത്തുവരുന്നത്. കേരളീയം പരിപാടി നടത്താനുള്ള തുക കണ്ടെത്താൻ സ്പോൺസർമാരെ കണ്ടെത്താൻ മികച്ച പ്രവർത്തനം നടത്തിയ ജി എസ് ടി ഇന്റലിജൻസ് മേധാവിയെ മുഖ്യമന്ത്രി പരസ്യമായി ഉപഹാരം നൽകി അഭിനന്ദിച്ചത് ഏറെ വിവാദമായിരുന്നു.