മുഖ്യമന്ത്രിക്കസേരക്കുവേണ്ടി പോര് തുടരുന്നു; ഡി.കെ ശിവകുമാറിനെ വീണ്ടും ദില്ലിയിലേയ്ക്ക് വിളിപ്പിച്ച് കോൺഗ്രസ് ദേശീയ നേതൃത്വം

കർണാടകയിൽ മുഖ്യമന്ത്രി ആരെന്നുള്ള ചോദ്യം ഇപ്പോഴും ബാക്കി നിൽക്കുകയാണ്.മുഖ്യമന്ത്രിയെ കോണ്‍ഗ്രസ് ഹൈക്കമാന്‍ഡ് ഇന്ന് പ്രഖ്യാപിച്ചേക്കുമെന്നാണ് സൂചന.മുഖ്യമന്ത്രിപദത്തെച്ചൊല്ലി ഇടഞ്ഞു നില്‍ക്കുന്ന ഡി കെ ശിവകുമാര്‍ മുന്‍ നിലപാട് മാറ്റി ചര്‍ച്ചകള്‍ക്കായി ഇന്ന് ദില്ലിയിലെത്തും.ഇന്നുതന്നെ ദില്ലിയിൽ എത്താനാണ് ദേശീയ നേതൃത്വം നിർദ്ദേശിച്ചിട്ടുള്ളത്.ദില്ലിയിലെത്താൻ തനിക്ക് ചില ആരോഗ്യപ്രശ്‌നങ്ങളുണ്ടെന്ന് പറഞ്ഞാണ് ഡി കെ ശിവകുമാർ തന്റെ ദില്ലി യാത്ര നാടകീയമായി റദ്ദാക്കിയിരുന്നത്. ഡി കെ ശിവകുമാറുമായി സോണിയാ ഗാന്ധി ഉൾപ്പെടെയുള്ളവർ ചർച്ച നടത്തിയേക്കുമെന്നാണ് റിപ്പോർട്ടുകൾ.

എഐസിസി നിരീക്ഷകര്‍ ഇന്നും കോണ്‍ഗ്രസ് പ്രസിഡന്റ് മല്ലികാര്‍ജുന്‍ ഖര്‍ഗെയുമായി ചര്‍ച്ച നടത്തും. പിന്നീട് സിദ്ധരാമയ്യ, ശിവകുമാര്‍ എന്നിവരുമായും കൂടിക്കാഴ്ച നടത്തും. ഗാന്ധി കുടുംബവുമായി കൂടിയാലോചിച്ചശേഷമാകും മുഖ്യമന്ത്രി പദത്തില്‍ ഖര്‍ഗെ തീരുമാനം പ്രഖ്യാപിക്കുക.ബംഗലൂരുവില്‍ ചേര്‍ന്ന കോണ്‍ഗ്രസ് എംഎല്‍എമാരുടെ യോഗത്തില്‍ 85 പേര്‍ സിദ്ധരാമയ്യയെ പിന്തുണച്ചുവെന്നാണ് റിപ്പോര്‍ട്ടുകള്‍. 45 എംഎല്‍എമാരാണ് ഡികെ ശിവകുമാര്‍ മുഖ്യമന്ത്രിയാകണമെന്ന് അഭിപ്രായം അറിയിച്ചത്. ആറു എംഎല്‍എമാര്‍ മുഖ്യമന്ത്രിയെ ഹൈക്കമാന്‍ഡ് തീരുമാനിക്കട്ടെ എന്ന നിലപാടും അറിയിച്ചുവെന്നാണ് നിരീക്ഷകര്‍ ഖാര്‍ഗെയ്ക്ക് റിപ്പോര്‍ട്ട് നല്‍കിയിട്ടുള്ളത്.മുഖ്യമന്ത്രിയെ തെരഞ്ഞെടുത്ത ശേഷം വലിയ സംഘർഷ സാധ്യതകളും മുന്നിൽ കാണുന്നുണ്ട്.മുഖ്യമന്ത്രിക്കസേരയ്ക്ക് വേണ്ടിയുള്ള മൽപിടിത്തത്തിന്റെ എല്ലാ ലക്ഷണങ്ങളും തെരഞ്ഞെടുപ്പ് ഫലം വന്നതോടെ വ്യക്തമായിട്ടുണ്ട്.