ലൗ ജിഹാദിനെയും കൃഷ്ണനും രുക്മിണിയും തമ്മിലുള്ള പ്രണയത്തെയും താരതമ്യം ചെയ്ത സംഭവം ; ക്ഷമാപണം നടത്തി കോൺഗ്രസ് അസം പ്രസിഡന്റ് ഭുപൻ ബോറ

ഗുവാഹത്തി : ലൗ ജിഹാദിനെയും കൃഷ്ണനും രുക്മിണിയും തമ്മിലുള്ള പ്രണയത്തെയും താരതമ്യം ചെയ്ത സംഭവത്തിൽ ക്ഷമാപണവുമായി കോൺഗ്രസ് അസം യൂണിറ്റ് പ്രസിഡന്റ് ഭുപൻ ബോറ. ഗോലാഘട്ട് കൊലക്കേസുമായി ബന്ധപ്പെട്ട് അസം മുഖ്യമന്ത്രി ഹിമന്ത ബിശ്വ ശർമ നടത്തിയ പരാമർശത്തിനു മറുപടി പറയവെയായിരുന്നു ബോറ വിവാദ പരാമർശം നടത്തിയത്.

തിങ്കളാഴ്ച, ഗോലാഘട്ട് ജില്ലയിൽ 25കാരൻ കുടുംബ പ്രശ്‌നങ്ങളുടെ പേരിൽ ഭാര്യയെയും അവരുടെ മാതാപിതാക്കളെയും കൊലപ്പെടുത്തിയശേഷം പൊലീസിനു മുന്നിൽ കീഴടങ്ങിയിരുന്നു. യുവാവ് മുസ്‌ലിം വിഭാഗത്തിൽപ്പെട്ടയാളാണ്. ഭാര്യ ഹിന്ദു ആയതിനാൽ സംഭവം ലൗ ജിഹാദാണെന്നാണ് മുഖ്യമന്ത്രി പ്രതികരിച്ചത്. ഇതിനോട് പ്രതികരിച്ച ബോറ കൃഷ്ണൻ രുക്മിണിയോടൊപ്പം ഒളിച്ചോടിയതുൾപ്പെടെ നമ്മുടെ പ്രാചീന ഗ്രന്ഥങ്ങളിൽ നിരവധി കഥകളുണ്ടെന്നും ഇന്നത്തെ കാലഘട്ടത്തിൽ വ്യത്യസ്ത മതക്കാരും സമുദായക്കാരും തമ്മിലുള്ള വിവാഹത്തെക്കുറിച്ച് മുഖ്യമന്ത്രി വീണമീട്ടരുതെന്നും പറഞ്ഞു.

പിന്നാലെ ലൗ ജിഹാദും ഭഗവാൻ കൃഷ്ണന്റെയും രുക്മിണിയുടെയും പ്രണയകഥയും തമ്മിൽ താരതമ്യപ്പെടുത്തുന്നത് അപലപനീയമാണെന്നും നിർബന്ധിത മതപരിവർത്തനം കൃഷ്ണന്റെ കഥയിലില്ലെന്നും ഹിമന്ത തിരിച്ചടിച്ചു . മതവികാരം വ്രണപ്പെടുത്തിയതിനു ബോറയ്‌ക്കെതിരെ പൊലീസ് കേസെടുത്താൽ അറസ്റ്റ് ചെയ്യുമെന്ന് ഹിമന്ത മുന്നറിയിപ്പും നൽകിയിരുന്നു. ഇതിണ് പിന്നാലെയാണ് ബോറ ക്ഷമാപണവുമായി രംഗത്തുവന്നത്.

കഴിഞ്ഞ രാത്രിയിൽ സ്വപ്നത്തിൽ വന്ന മുത്തച്ഛൻ, തന്റെ പ്രസ്താവന ജനങ്ങളെ വേദനിപ്പിച്ചുവെന്ന് പറഞ്ഞതിന്റെ അടിസ്ഥാനത്തിലാണ് മാപ്പ് പറയുന്നതെന്നാണ് ഇപ്പോൾ ബോറ പറയുന്നത്.