ആ മദ്യക്കുപ്പി കളഞ്ഞു കിട്ടിയതല്ല.. വഴിയിൽ കിടന്നുകിട്ടിയതെന്ന് പറഞ്ഞ് സുഹൃത്തു നൽകിയ മദ്യം കഴിച്ച് യുവാവ് മരിച്ച സംഭവം; കൊലപാതകമെന്ന് പോലീസ് കണ്ടെത്തൽ

അടിമാലി ∙ വഴിയിൽ കിടന്നു കിട്ടിയതെന്നു പറ‍ഞ്ഞ് സുഹൃത്ത് നൽകിയ മദ്യം കഴിച്ച് യുവാവ് മരിച്ച സംഭവം കൊലപാതകമെന്ന് പോലീസ് സ്ഥിരീകരിച്ചു. മദ്യം വഴിയിൽ കിടന്നു കിട്ടിയതല്ലെന്നും മറിച്ച് സുഹൃത്ത് വാങ്ങി വിഷം ചേർത്തു നൽകുകയായിരുന്നുവെന്നും പൊലീസ് കണ്ടെത്തി. മദ്യത്തിൽ വിഷം കലർത്തിയ സുഹൃത്ത് അടിമാലി കീരിത്തോട് സ്വദേശി സുധീഷിനെ പൊലീസ് അറസ്റ്റ് ചെയ്തു.

മദ്യം കഴിച്ച് അവശനിലയിലായതിനെ തുടർന്ന് കോട്ടയംമെഡിക്കൽ കോളജിൽചികിത്സയിലായിരുന്ന അടിമാലി സ്വദേശി കുഞ്ഞുമോൻ (40) ഇന്നലെ മരിച്ചിരുന്നു. മദ്യം കഴിച്ച മനോജ്, അനു എന്നിവർ ഇപ്പോഴും ചികിത്സയിലാണ്.

മനോജുമായി വ്യക്തിവൈരാഗ്യം ഉണ്ടായിരുന്ന സുധീഷ്, റം പൈന്റ് വാങ്ങി അടപ്പിൽ സുഷിരം ഉണ്ടാക്കുകയും ഇതിലൂടെ വിഷകീടനാശിനി സിറിഞ്ച് ഉപയോഗിച്ച് കുത്തിവയ്ക്കുകയുമായിരുന്നു. അതിനുശേഷം സംശയം തോന്നാതിരിക്കാൻ സുഷിരം മെഴുക് വച്ച് അടച്ചു. വഴിയിൽ കിടന്നുകിട്ടിയ കുപ്പിയെന്ന് പറഞ്ഞ് മനോജിനെ വിളിച്ചു വരുത്തി കുടിപ്പിക്കുകയായിരുന്നു.

എന്നാൽ മനോജിന്റെ കൂടെയെത്തിയ അനുവും കുഞ്ഞുമോനും വിഷം കലർത്തിയ മദ്യം കഴിച്ചതോടെയാണ് പ്ലാൻ പാളിയത്. ഛർദ്ദിയും ക്ഷീണവും വന്നതോടെ മൂവരെയും ആശുപത്രിയിലേക്കു മാറ്റുകയായിരുന്നു. ഇതോടെ സുധീഷ് മദ്യക്കുപ്പി കത്തിച്ചുകളയാനും ശ്രമിച്ചു. ഇടുക്കി എസ്പിയുടെ നേതൃത്വത്തിലുള്ള ചോദ്യം ചെയ്യലിലാണ് പ്രതി കുറ്റം സമ്മതിച്ചത്.