വനവാസം കഴിഞ്ഞു.. തോൽപ്പെട്ടി 17ാമൻ ഇനി തിരുവനന്തപുരത്തിന് സ്വന്തം ! കേണിച്ചിറയിൽ നിന്ന് പിടികൂടിയ ആൺ കടുവയെ മൃഗശാലയിൽ എത്തിച്ചു

വയനാട് കേണിച്ചിറയിൽ നിന്ന് പിടികൂടിയ ആൺ കടുവയെ തിരുവനന്തപുരം മൃഗശാലയിൽ എത്തിച്ചു. 21 ദിവസത്തെ ക്വാറന്‍റീനും ചികിത്സയ്ക്കും ശേഷം കടുവയെ മൃഗശാലയിലെ കൂട്ടിലേക്ക് മാറ്റും. മൃഗശാലയിലെ ബംഗാൾ പെൺകടുവയ്ക്ക് കൂട്ടായാണ് തോൽപ്പെട്ടി 17ാമൻ എന്ന പത്ത് വയസുള്ള കടുവയെ തിരുവനന്തപുരത്തെത്തിച്ചത്.

14 മണിക്കൂർ യാത്രയ്ക്ക് ഒടുവിൽ പ്രത്യേകം സജ്ജീകരിച്ച ആനിമൽ ആംബുലൻസിലാണ് കടുവയെ തിരുവനന്തപുരത്ത് എത്തിച്ചത്. യാത്രയിൽ ശാന്തനായിരുന്ന കടുവ മൃഗശാലയിൽ എത്തിച്ച് കൂട്ടിലേക്ക് കയറ്റുമ്പോൾ ഇടയ്ക്ക് ഒന്ന് ശൗര്യം വീണ്ടെടുത്തു. പിന്നെ പതുങ്ങി. ഇനി 21 ദിവസം നീണ്ട ക്വാറന്‍റീൻ. ചെറിയ ക്ഷീണവും നടക്കാൻ പ്രയാസവും ഉണ്ടെങ്കിലും ആരോഗ്യവാനാണ്.

നിലവിൽ തിരുവനന്തപുരം മൃഗശാലയിൽ നാല് കടുവകലാളാണുള്ളത് ഇതിൽ ബംഗാൾ ആൺ കടുവയ്ക്കും വെള്ളക്കടുവകൾക്കും പ്രായമായി. ഇത് കൂടാതെ ആരോഗ്യമുള്ള ഒരു ബംഗാൾ പെൺകടുവ കൂടി മൃഗശാലയിലുണ്ട്