തെക്കുകിഴക്കൻ ഏഷ്യയിലെ ഏറ്റവും സമ്പന്നമായ രാജ്യം ! ബ്രൂണൈ സന്ദർശിക്കുന്ന ആദ്യ ഇന്ത്യൻ പ്രധാനമന്ത്രിയാകാൻ നരേന്ദ്രമോദി

ദില്ലി : തെക്കുകിഴക്കൻ ഏഷ്യയിലെ ഏറ്റവും സമ്പന്നമായ രാജ്യങ്ങളിൽ ഒന്നായ ബ്രൂണൈ സന്ദർശിക്കാൻ പ്രധാനമന്ത്രി നരേന്ദ്രമോദി. ബ്രൂണൈ സന്ദർശിക്കുന്ന ആദ്യ ഇന്ത്യൻ പ്രധാനമന്ത്രിയാണ് നരേന്ദ്രമോദി. സെപ്റ്റംബർ ആദ്യവാരം പ്രധാനമന്ത്രി നടത്തുന്ന സിംഗപ്പൂർ സന്ദർശനത്തിനോടൊപ്പമാണ് ബ്രൂണൈയിലും സന്ദർശനം നടത്തുക. ബ്രൂണൈ സുൽത്താൻ ഹാജി ഹസ്സനൽ ബോൾകിയയുടെ പ്രത്യേക ക്ഷണപ്രകാരമാണ് മോദിയുടെ സന്ദർശനം.

തെക്കു കിഴക്കൻ ഏഷ്യയിലെ ഏറ്റവും സമ്പന്നമായ രാജ്യങ്ങളിൽ ഒന്നും രണ്ടും സ്ഥാനത്തുള്ള രാജ്യങ്ങളാണ് സിംഗപ്പൂരും ബ്രൂണൈയും. ഇന്ത്യയും ബ്രൂണൈയും തമ്മിലുള്ള നയതന്ത്ര ബന്ധത്തിന്റെ നാല്പതാം വാർഷിക വേളയിലാണ് പ്രധാനമന്ത്രിയുടെ ഈ സന്ദർശനം എന്നതാണ് എടുത്തുപറയേണ്ട കാര്യം. കൂടാതെ, 40 വർഷങ്ങൾ നീണ്ട നയതന്ത്ര ബന്ധം ഉണ്ടായിട്ടും ഇതുവരെ മറ്റൊരു ഇന്ത്യൻ പ്രധാനമന്ത്രി പോലും ബ്രൂണൈ സന്ദർശിച്ചിട്ടില്ല എന്നുള്ളതും ശ്രദ്ധേയമാണ്.