അലൻസിയർക്കെതിരായ പരാതിയിൽ നടപടിയുണ്ടായില്ല !തൊഴിലിടത്തിൽ സ്ത്രീകളുടെ സുരക്ഷ ഉറപ്പാക്കാൻ സംഘടന തയ്യാറാകണം ! താരസംഘടന അമ്മയ്ക്കെതിരെ തുറന്നടിച്ച് നടി ദിവ്യ ഗോപിനാഥ്

തിരുവനന്തപുരം: താരസംഘടന അമ്മയ്ക്കെതിരെ രൂക്ഷ വിമർശനവുമായി നടി ദിവ്യ ഗോപിനാഥ്. നടൻ അലൻസിയർക്കെതിരായ തന്‍റെ പരാതിയിൽ സംഘടന ഇതുവരെ നടപടിയെടുത്തില്ലെന്ന് നടി ആരോപിച്ചു. ആഭാസം എന്ന സിനിമയുടെ സെറ്റില്‍ വെച്ച് അലന്‍സിയര്‍ മോശമായി പെരുമാറിയെന്നാണ് ദിവ്യ ആരോപിക്കുന്നത്. 2018ല്‍ തന്നെ അമ്മയില്‍ പരാതി നല്‍കിയിരുന്നു. ഈ പരാതിയിൽ നടപടിയുണ്ടായില്ലെന്നാണ് നടിയുടെ ആരോപണം. അതേസമയം ആരോപണവിധേയനായ അലൻസിയർ ഇപ്പോഴും സിനിമയിൽ സജീവമാണ്. ഹേമ കമ്മിറ്റിയിലും ദിവ്യ മൊഴി നല്‍കിയിരുന്നു.

“ആഭാസം എന്ന സിനിമയുടെ സെറ്റിൽ വെച്ചാണ് അലൻസിയർ മോശമായി പെരുമാറിയത്. തുടർന്ന് 2018 ൽ പരാതി നൽകി. വീണ്ടും ഇക്കാര്യം ഇടവേള ബാബുവിന്‍റെ ശ്രദ്ധയിൽപ്പെടുത്തി. എന്നാൽ അലൻസിയർ ക്ഷമ പറഞ്ഞല്ലോ എന്നായിരുന്നു മറുപടി ലഭിച്ചത്. പരാതി നൽകിയിട്ട് അമ്മ ഇതുവരെ ഔദ്യോഗികമായി മറുപടി നൽകിയിട്ടില്ല. തൊഴിലിടത്തിൽ സ്ത്രീകളുടെ സുരക്ഷ ഉറപ്പാക്കാൻ അമ്മ തയ്യാറാകണം. തനിക്ക് സിനിമയിലെ അവസരം കുറഞ്ഞു, പക്ഷേ അലൻസിയർക്ക് പ്രത്യേകിച്ച് നഷ്ടങ്ങൾ ഒന്നും ഉണ്ടായില്ല. അന്ന് അമ്മ നടത്തിയ വിട്ടുവീഴ്ചയാണ് സംസ്ഥാന അവാർഡ് വേദിയിൽ പോലും സ്ത്രീവിരുദ്ധമായി സംസാരിക്കാൻ അലൻസിയർക്ക് ധൈര്യം ഉണ്ടായത്.”- ദിവ്യ ഗോപിനാഥ് പറഞ്ഞു.