ആമയിഴഞ്ചാൻ അപകടം : മേയർ ആര്യ രാജേന്ദ്രൻ രാജി വയ്ക്കണം ! യൂത്ത് കോൺഗ്രസിന്റെ കോർപ്പറേഷൻ മാർച്ചിൽ സംഘർഷം ; ജലപീരങ്കി പ്രയോഗിച്ച് പോലീസ്

തിരുവനന്തപുരം : നഗരസഭയിലേക്ക് യൂത്ത് കോണ്‍ഗ്രസ് സംഘടിപ്പിച്ച മാര്‍ച്ചില്‍ സംഘര്‍ഷം. ആമയിഴഞ്ചാൻ തോട്ടിലെ ശുചീകരണത്തിനിടെ മരണപ്പെട്ട തൊഴിലാളി ജോയിയുടെ മരണത്തിൽ പ്രതിഷേധിച്ചാണ് നഗരസഭയിലേക്ക് യൂത്ത് കോണ്‍ഗ്രസ് മാർച്ച് നടത്തിയത്. മേയർ ആര്യ രാജേന്ദ്രൻ രാജി വയ്ക്കണമെന്നാണ് ആവശ്യം. പ്രതിഷേധക്കാർ ബാരിക്കേഡ് മറിച്ചിടാൻ ശ്രമം നടത്തിയതോടെ പോലീസ് ജലപീരങ്കി പ്രയോഗിക്കുകയും ലാത്തി വീശുകയും ചെയ്തു.

അതേസമയം, ജോയിയുടെ മാതാവിന് 10 ലക്ഷം രൂപ നൽകാൻ സംസ്ഥാന സർക്കാർ തീരുമാനിച്ചു. മുഖ്യമന്ത്രിയുടെ ദുരിതാശ്വാസനിധിയിൽ നിന്നാണ് 10 ലക്ഷം രൂപ നൽകാൻ മന്ത്രിസഭായോഗം തീരുമാനിച്ചത്. ജോയിയുടെ മാതാവിന് വീട് വച്ച് നൽകുമെന്നും മേയർ ആര്യ രാജേന്ദ്രൻ അറിയിച്ചു.

കഴിഞ്ഞ ശനിയാഴ്ചയാണ് ആമയിഴഞ്ചാന്‍ തോട് ശുചീകരിക്കുന്നതിനിടെ ജോയിയെ കാണാതായത്. 46 മണിക്കൂറിന് ശേഷമാണ് മൃതദേഹം കണ്ടെത്തിയത്. പഴവങ്ങാടി തകരപ്പറമ്പ് ചിത്ര ഹോമിന്റെ പുറകിലെ കനാലിൽ നിന്നും മൃതദേഹം കണ്ടെത്തുകയായിരുന്നു.