“മൻമോഹൻ സിങ്ങിന് മീതെ സോണിയ ​ഗാന്ധിയെ സ്ഥാപിച്ച കോൺഗ്രസ് ! ഇന്ന് അദ്ദേഹത്തിന്റെ മരണത്തിലും രാഹുലും ഖാർ​ഗെയും രാഷ്ട്രീയം കളിക്കുന്നു !” രൂക്ഷവിമർശനവുമായി ജെ പി നദ്ദ

അന്തരിച്ച മുൻ പ്രധാനമന്ത്രി ഡോ. മൻമോഹൻ സിങ്ങിന്റെ സംസ്കാരവുമായി ബന്ധപ്പെട്ട് വിവാദമുണ്ടാക്കാൻ ശ്രമിച്ച കോൺ​ഗ്രസിനെതിരേ രൂക്ഷവിമർശനവുമായി കേന്ദ്ര ആരോഗ്യമന്ത്രിയും ബിജെപി ദേശീയ അദ്ധ്യക്ഷനുമായ ജെ പി നദ്ദ. മൻമോഹൻ സിങ്‌ ജീവിച്ചിരുന്നപ്പോൾ അദ്ദേഹത്തെ ആദരിക്കുന്നതിൽ പരാജയപ്പെട്ട പാർട്ടിയാണ് കോൺ​ഗ്രസ്. ഇപ്പോൾ രാഷ്ട്രീയ നേട്ടങ്ങൾക്കായി അദ്ദേഹത്തിന്റെ പാരമ്പര്യത്തെ ചൂഷണം ചെയ്യുകയാണെന്നും നഡ്ഡ ആരോപിച്ചു.

‘മുൻ പ്രധാനമന്ത്രി മൻമോഹൻ സിങ്ങിന്റെ മരണത്തിലും രാഹുൽ ​ഗാന്ധിയും മല്ലികാർജുൻ ഖാർ​ഗെയും രാഷ്ട്രീയം കളിക്കുന്നതിൽനിന്ന് വിട്ടുനിൽക്കുന്നില്ല എന്നത് ദൗർഭാ​ഗ്യകരമാണ്. മൻമോഹൻ സിങ്ങിന് മീതെ സൂപ്പർ പ്രധാനമന്ത്രിയായി സോണിയ ​ഗാന്ധിയെ സ്ഥാപിച്ച് പ്രധാനമന്ത്രി പദത്തിന്റെ അന്തസ്സിന് കളങ്കം വരുത്തിയ അതേ കോൺ​ഗ്രസാണിത്. ഓർഡിനൻസ് കീറിയെറിഞ്ഞുകൊണ്ട് മൻമോഹൻ സിങ്ങിനെ രാഹുൽ അപമാനിച്ചു. ഇന്ന് അതേ രാഹുൽ രാഷ്ട്രീയം കളിക്കുകയാണ്’, നദ്ദ പറഞ്ഞു.

മന്‍മോഹന്‍ സിങ്ങിന്റെ സംസ്‌കാരം നിഗംബോധ് ഘട്ടില്‍ നടത്തിയതിലൂടെ കേന്ദ്ര സര്‍ക്കാര്‍ അദ്ദേഹത്തെ അപമാനിച്ചുവെന്ന് നേരത്തെ രാഹുല്‍ ഗാന്ധി ആരോപിച്ചത് വൻ വിവാദമായിരുന്നു.