ബിജെപിക്ക് 272 സീറ്റുകൾ കിട്ടിയില്ലെങ്കിൽ എന്ത് ചെയ്യും ? പ്ലാൻ ബി ജൂൺ നാലിന് പുറത്തെടുക്കുമോ ? ചോദ്യങ്ങൾക്ക് കലക്കൻ മറുപടി നൽകി അമിത് ഷാ

ദില്ലി : ബിജെപി വീണ്ടും അധികാരത്തിൽ എത്തിയാൽ നരേന്ദ്ര മോദി പ്രധാനമന്ത്രിയാകുമോ എന്ന ചോദ്യമാണ് രാഷ്ട്രീയ ലോകം ചർച്ച ചെയ്യുന്നത്. ഇത്തവണയും പൂർണ വിശ്വാസത്തോടെയാണ് ബിജെപി തിരഞ്ഞെടുപ്പിനെ നേരിടുന്നത്. എന്നാൽ ഇത്തവണ ബിജെപിക്ക് 272 സീറ്റ് നേടാൻ സാധിച്ചില്ലെങ്കിൽ പ്ലാൻ ബി എന്താണെന്ന ചോദ്യത്തിന് അമിത് ഷാ നൽകിയ മറുപടിയാണ് ഇപ്പോൾ ചർച്ചയാകുന്നത്.

അത്തരം ഒരു സാഹചര്യത്തിന് ഒരു സാധ്യതയും കാണുന്നില്ലെന്നാണ് അമിത് ഷാ പറയുന്നത്. മോദി സർക്കാർ നൽകിയ ആനുകൂല്യങ്ങളുടെ ഗുണഭോക്താക്കളായ 60 കോടി ജനങ്ങൾ ഉൾപ്പെടുന്ന ശക്തമായ സൈന്യമാണ് അദ്ദേഹത്തിനൊപ്പമുളളത്. അവർക്ക് ഒരു ജാതിയുമില്ല പ്രായവ്യത്യാസവുമില്ല. മോദി എന്താണെന്നും എന്തുകൊണ്ട് 400 ലധികം സീറ്റുകൾ നൽകണമെന്നും അവർക്ക് അറിയാമെന്നും അമിത് ഷാ വ്യക്തമാക്കി. അതുകൊണ്ടു തന്നെ ബിജെപിക്ക് പ്ലാൻ ബി ഇല്ല. കൂടാതെ, പ്ലാൻ എ തന്നെ വിജയിക്കുമെന്നും അദ്ദേഹം കൂട്ടിച്ചേർത്തു. എന്തെന്നാൽ, പ്ലാൻ എ നടപ്പാകാൻ 60 ശതമാനത്തിൽ താഴെ മാത്രം സാധ്യതയുളളപ്പോഴാണ് പ്ലാൻ ബിയെക്കുറിച്ച് ചിന്തിക്കേണ്ടത്. പ്രധാനമന്ത്രി നരേന്ദ്രമോദി വലിയ ഭൂരിപക്ഷത്തോടെ അധികാരത്തിലെത്തുമെന്ന് തനിക്ക് ഉറപ്പാണെന്നും അമിത് ഷാ വ്യക്തമാക്കി.