കൂട്ടുകാർ പിടിയിലായപ്പോൾ അജ്ഞാത കേന്ദ്രത്തിലേക്ക് മുങ്ങി ! സ്‌ഫോടക വസ്‌തുക്കൾ നിറച്ച കാറുമായി സ്വയം പൊട്ടിത്തെറിച്ചു ? ദില്ലി ചാവേറാക്രമണത്തിന്റെ മുഖ്യ സൂത്രധാരൻ വൈറ്റ് കോളർ ജിഹാദ് സംഘാംഗമായ ജെയ്‌ഷെ മുഹമ്മദ് ഭീകരൻ ഉമർ മുഹമ്മദ് ?

ദില്ലി: ഇന്നലെ രാജ്യതലസ്ഥാനത്തെ നടുക്കിയ സ്‌ഫോടനത്തിന് പിന്നിൽ ജെയ്ഷെ ഭീകരൻ ഡോ ഉമർ മുഹമ്മദ് ആണെന്ന് സൂചന. ഡോ ഉമർ മുഹമ്മദ് അടങ്ങുന്ന ഭീകര സംഘത്തിലെ ചിലർ കഴിഞ്ഞദിവസം പോലീസിന്റെ പിടിയിലായിരുന്നു. 3000 കിലോയോളം വരുന്ന സ്‌ഫോടക വസ്തുക്കൾ ഇവരുടെ ഫരീദാബാദിലെ വാടക വീട്ടിൽ നിന്ന് പിടിച്ചെടുത്തിരുന്നു. സംഘം ആസൂത്രണം ചെയ്‌ത വൻ ഭീകരാക്രമണം പോലീസ് തകർത്തതോടെ മറ്റെവിടെയോ സൂക്ഷിച്ചിരുന്ന സ്‌ഫോടക വസ്തുക്കളുമായി കാർബോംബ് സ്ഫോടനം നടത്തുകയായിരുന്നു എന്നാണ് സൂചന. പൊട്ടിത്തെറിയിൽ ഉമർ മുഹമ്മദും കൊല്ലപ്പെട്ടിരിക്കാനാണ് സാധ്യത.

വൈറ്റ് കോളർ ജിഹാദികൾ എന്നറിയപ്പെടുന്ന ഡോക്ടർമാരുടെ സംഘമാണ് ജെയ്ഷെ മുഹമ്മദിന്റെ നിർദ്ദേശാനുസരണം ഭീകരാക്രമണം പദ്ധതിയിട്ടത്. ഈ സംഘാംഗമായ അനന്തനാഗ് സർക്കാർ മെഡിക്കൽ കോളേജിലെ ഡോക്ടറായ ഡോ അഹമ്മദ് റാത്തറാണ് ആദ്യം പിടിയിലാകുന്നത്. രഹസ്യാന്വേഷണ ഏജൻസികൾ മാസങ്ങളായി ഈ സംഘത്തെ നിരീക്ഷിച്ചിരുന്നു. ഇയാളെ ചോദ്യം ചെയ്തതിൽ നിന്നുള്ള വിവരങ്ങൾ അനുസരിച്ചാണ്.മറ്റ് രണ്ടു ഡോക്ടർമാരെ കൂടി കഴിഞ്ഞ ദിവസം പോലീസ് പിടികൂടിയത്. ഡോ മുസമ്മിൽ ഷക്കീലും, ഡോ ഷഹീൻ ഷാഹിദും പിടിയിലായെങ്കിലും ഉമർ മുഹമ്മദ് രക്ഷപെടുകയായിരുന്നു. പോലീസ് പിന്നാലെയുണ്ടെന്ന പരിഭ്രാന്തിയോടെ ഉമർ മുഹമ്മദ് പെട്ടെന്ന് ആസൂത്രണം ചെയ്‌ത്‌ നടപ്പിലാക്കിയതാണ് ഇന്നലത്തെ സ്ഫോടനമെന്നാണ് റിപ്പോർട്ടുകൾ.

സ്ഫോടനത്തിന്റെ അന്വേഷണം ഉടൻ എൻ ഐ എയ്ക്ക് കൈമാറിയേക്കും. നിലവിൽ പ്രദേശം അന്വേഷണ ഉദ്യോഗസ്ഥരുടെ നിയന്ത്രണത്തിലാണ്. ഫോറൻസിക് തെളിവുകൾ ശേഖരിച്ചു കഴിഞ്ഞു. സ്ഥലത്ത് അമോണിയം നൈട്രേറ്റിന്റെ സന്നനിധ്യം ഏതാണ്ട് ഉറപ്പിച്ചുകഴിഞ്ഞു. കേന്ദ്ര ആഭ്യന്തര മന്ത്രി അമിത് ഷായുടെ നേതൃത്വത്തിൽ അടിയന്തര അവലോകനയോഗം ദില്ലിയിൽ ചേരുകയാണ്.