ജനവാസ മേഖലയിലെ വന്യമൃഗ ആക്രമണം: അക്രമകാരികളായ മൃഗങ്ങളെ വെടിവെച്ചുകൊല്ലാൻ നിയമഭേദഗതിക്ക് സർക്കാർ അംഗീകാരം

തിരുവനന്തപുരം: ജനവാസ മേഖലകളിലിറങ്ങി അക്രമം നടത്തുന്ന വന്യമൃഗങ്ങളെ വെടിവെച്ചുകൊല്ലാൻ അതിവേഗത്തിൽ അനുമതി നൽകുന്ന നിയമഭേദഗതിക്ക് സംസ്ഥാന മന്ത്രിസഭയുടെ അംഗീകാരം . കേന്ദ്ര വന്യജീവി സംരക്ഷണ നിയമം 1972-ൽ മാറ്റങ്ങൾ വരുത്തുന്നതിനുള്ള ബിൽ അടുത്ത നിയമസഭാ സമ്മേളനത്തിൽ അവതരിപ്പിക്കും. വന്യജീവി ആക്രമണം തുടർക്കഥയായ മലയോരങ്ങളിൽ കനത്ത ജനരോഷം നിലനിൽക്കുന്ന സാഹചര്യത്തിലാണ് ഈ നിർണായക തീരുമാനം.

പുതിയ ഭേദഗതി അനുസരിച്ച്, ജനവാസ മേഖലയിൽ ഇറങ്ങി അക്രമം നടത്തുന്ന മൃഗങ്ങളെ വെടിവെച്ചുകൊല്ലാൻ ചീഫ് വൈൽഡ് ലൈഫ് വാർഡന് അതിവേഗം ഉത്തരവിറക്കാൻ സാധിക്കും. കളക്ടറുടെയോ ചീഫ് ഫോറസ്റ്റ് കൺസർവേറ്ററുടെയോ ശുപാർശ മാത്രം ഇതിന് മതിയാകും. വെടിവെച്ചുകൊല്ലുകയോ അല്ലെങ്കിൽ മയക്കുവെടി വെക്കുകയോ ചെയ്യാം.

നിലവിലെ നിയമപ്രകാരം, വെടിവെച്ചുകൊല്ലാനുള്ള അനുമതി ലഭിക്കാൻ നടപടിക്രമങ്ങൾ ഏറെയാണ്. കാട്ടിലേക്ക് തുരത്താനാണ് ആദ്യം ശ്രമിക്കുക. അത് പരാജയപ്പെട്ടാൽ മാത്രമേ വെടിവെക്കുന്നത് അവസാന മാർഗമായി പരിഗണിക്കൂ. ഇതിനായി ആറ് അംഗ വിദഗ്ദ്ധ സമിതിയുടെ അനുമതിയും ആവശ്യമാണ്. കൂടാതെ, ആക്രമിച്ച മൃഗത്തെ തന്നെയാണ് കൊല്ലുന്നതെന്ന് ഫോട്ടോ ഉൾപ്പെടെയുള്ള തെളിവുകളോടെ ഉറപ്പാക്കുകയും വേണം. ഒരു കടുവയെ കൊല്ലണമെങ്കിൽ അത് നരഭോജിയാണെന്ന് വ്യക്തമാക്കണം.

അതേസമയം കേന്ദ്ര നിയമത്തിൽ ഭേദഗതി വരുത്താൻ സംസ്ഥാനത്തിന് നിർദ്ദേശം നൽകാമെങ്കിലും, ബിൽ നിയമമാകണമെങ്കിൽ ഗവർണറുടെയും രാഷ്ട്രപതിയുടെയും അംഗീകാരം നിർബന്ധമാണ്. തിങ്കളാഴ്ച ആരംഭിക്കുന്ന നിയമസഭാ സമ്മേളനത്തിൽ ബിൽ അവതരിപ്പിച്ച് പാസാക്കിയാലും, ഈ കടമ്പകൾ മറികടക്കുക സർക്കാരിന് വലിയ വെല്ലുവിളിയാകും. അതേസമയം, കാട്ടുപന്നികളെ ഉൾപ്പെടെയുള്ള മൃഗങ്ങളെ ക്ഷുദ്രജീവികളുടെ പട്ടികയിൽ ഉൾപ്പെടുത്താനുള്ള ഭേദഗതിക്കും മന്ത്രിസഭ അംഗീകാരം നൽകി. സ്വകാര്യഭൂമിയിലെ ചന്ദനമരം മുറിക്കാൻ വനംവകുപ്പിന്റെ അനുമതി തേടുന്നതിനുള്ള ബില്ലിനും അംഗീകാരമായി. എന്നാൽ, ഫോറസ്റ്റ് എക്കോ ടൂറിസം ബോർഡ് രൂപീകരിക്കാനുള്ള ബിൽ മാറ്റിവെച്ചിട്ടുണ്ട്.