ദുർമന്ത്രവാദം; മന്ത്രവാദി ഉൾപ്പെടെ 4 പേർ ഒളിവിൽ തുടരുന്നു; പ്രധാനപ്രതി അബ്ദുൾ ജബ്ബാറിനെതിരെ പോലീസിൽ പരാതിയുമായി കൂടുതൽ പേർ

കൊല്ലം: മധുവിധുവിനെന്ന വ്യാജേന യുവതിയെ കൂട്ടിക്കൊണ്ടുപോയി നഗ്നയാക്കി ദുർമന്ത്രവാദം നടത്താൻ ശ്രമിച്ച കേസിൽ ഭർത്താവും സഹോദരിയും മന്ത്രവാദിയും സഹായിയും ഒളിവിൽ തുടരുന്നു. യുവതിയുടെ പരാതിയിൽ ഭർത്തൃമാതാവ് അറസ്റ്റിലായിരുന്നു. ഇവരെ കോടതിയിൽ ഹാജരാക്കി. തിരുവനന്തപുരം ആറ്റിങ്ങൽ സ്വദേശിനി ലൈഷയാണ് (60) അറസ്റ്റിലായത്. കുരിയോട് നെട്ടത്തറ സ്വദേശി അബ്ദുൾ ജബ്ബാർ ഇയാളുടെ സഹായി കുരിയോട് നെട്ടത്തറ സ്വദേശി സിദ്ദിഖ്, യുവതിയുടെ ഭർത്താവ് സത്യബാബു, ഭർതൃ സഹോദരി ശ്രുതി എന്നിവരാണ് ഒളിവിൽ തുടരുന്നത്. ഇവർ തമിഴ്നാട്ടിലേക്ക് കടന്നുവെന്ന സൂചനകളും പുറത്തു വരുന്നുണ്ട്. ചടയമംഗലം പോലീസാണ് കേസെടുത്തിരിക്കുന്നത്.

അതേസമയം, അബ്ദുൾ ജബ്ബാറിനെതിരെ പരാതിയുമായി നിരവധി പേർ പോലീസിൽ പരാതി നൽകിയതായി റിപ്പോർട്ട്. കൂടാതെ ഇന്നലെ അബ്ദുൾജബ്ബാറിന്റെ സഹായിയായ സിദ്ദിഖിന്റെ പിണങ്ങി കഴിയുന്ന ഭാര്യയും ഭാര്യാമാതാവും സ്റ്റേഷനിലെത്തി പരാതി നൽകിയിരുന്നു. സിദ്ദിഖ് ഒരുപാടു പെൺകുട്ടികളെ പീഡനത്തിനിരയാക്കിയിട്ടുണ്ടെന്നാണ് പരാതി. പ്രതികൾക്കായുള്ള തിരച്ചിൽ പോലീസ് ഊർജ്ജിതമാക്കി.

തന്നെ മധുവിധുവിനെന്ന വ്യാജേന കൂട്ടിക്കൊണ്ടു പോകുകയും ഭർത്താവിൻ്റെയും കുടുംബാംഗങ്ങളുടെയും ഒത്താശയോടെ നഗ്നയാക്കി പൂജ നടത്താൻ മന്ത്രവാദി ശ്രമിച്ചെന്നുമാണ് യുവതി പരാതി നൽകിയിരിക്കുന്നത്.

അഞ്ചു വർഷം മുൻപ് നടന്ന സംഭവം ഇപ്പോഴാണ് കേസാകുന്നത്. 2017 ജനുവരി 18ന് തമിഴ്നാട്ടിൽ വച്ചാണ് യുവതിയെ നഗ്നപൂജ നടത്താൻ ശ്രമിച്ചത്. നാഗൂർ പള്ളിക്കടുത്ത് ലോഡ്‌ജിൽ വച്ചായിരുന്നു സംഭവം. 2016 ഡിസംബറിലായിരുന്നു പരാതിക്കാരിയുടെ വിവാഹം നടന്നത്. വിവാഹത്തിനു പിന്നാലെ ബംഗളൂരുവിൽ മധുവിധുവിന് പോകുന്നു എന്ന പേരിൽ നാഗൂരിൽ എത്തുകയായിരുന്നു.