“വരി തെറ്റിക്കുന്ന വാക്കുകൾ” ! മുതിർന്ന മാദ്ധ്യമ പ്രവർത്തകനും കവിയുമായ ടോബി തലയലിന്റെ കവിതാസമാഹാരം പ്രകാശനം ചെയ്തു

തിരുവനന്തപുരം: മുതിർന്ന മാദ്ധ്യമ പ്രവർത്തകനും കവിയുമായ ടോബി തലയലിന്റെ ‘വരി തെറ്റിക്കുന്ന വാക്കുകൾ’ എന്ന കവിതാസമാഹാരം പ്രകാശനം ചെയ്തു. സാഹിത്യനിരൂപകനും കേരള യൂണിവേഴ്സിറ്റിയുടെ ഫാക്കൽറ്റി ഓഫ് ഓറിയന്റൽ സ്റ്റഡീസ് ഡീനുമായ ഡോ. എ എം ഉണ്ണിക്കൃഷ്ണനാണ് പ്രസ്സ് ക്ലബ്ബിൽ നടന്ന ചടങ്ങിൽ പുസ്തകം പ്രകാശനം ചെയ്തത്.

കവിയും പ്രഭാഷകനുമായ ഡി. അനിൽ കുമാർ കവിതാസമാഹാരത്തിന്റെ ആദ്യ കോപ്പി സ്വീകരിച്ചു. ചടങ്ങിൽ കവിയും അദ്ധ്യാപകനുമായ ഡി. യേശുദാസ്‌ പുസ്തകാവതരണം നടത്തുകയും എഴുത്തുകാരനും പരിധി പബ്ലിക്കേഷന്സിന്റെ സാരഥിയുമായ ഡോ. എം രാജീവ് കുമാർ സ്വാഗതം ആശംസിക്കുകയും ചെയ്തു. കൂടാതെ, രാജ്ഭവൻ പി ആർ ഓ എസ്.ഡി. പ്രിൻസ്, കവിയും നോവലിസ്റ്റുമായ ഡോ. ജേക്കബ് സാംസൺ, മുതിർന്ന മാദ്ധ്യമ പ്രവർത്തകൻ സാമുവൽ കുട്ടി എന്നിവർ ആശംസാപ്രഭാഷണം നടത്തുകയും ടോബി തലയൽ നന്ദിയും പ്രകാശിപ്പിച്ചു.

ടോബി തലയൽ മാദ്ധ്യമ പ്രവർത്തകൻ, കവി എന്നീ നിലകളിൽ ശ്രദ്ധേയനാണ്. തിരുവനന്തപുരം ജില്ലയിലെ ബാലരാമപുരം സ്വദേശിയായ അദ്ദേഹം, ദ ന്യൂ ഇൻഡ്യൻ എക്‌സ്പ്രസ്സിന്റെ പത്രാധിപസമിതിയിൽ 17 വർഷം അംഗമായിരുന്നു. തുടർന്ന്, മസ്‌കറ്റിലെ ഒമാൻ ട്രിബ്യുൺ, ഒമാൻ ഡെയ്‌ലി ഒബ്സർവർ എന്നീ പത്രങ്ങളിലും പ്രവർത്തിച്ചു. ഇപ്പോൾ ആനുകാലികങ്ങളിലും ഓൺലൈൻ പ്രസിദ്ധീകരണങ്ങളിലും കവിതയും ലേഖനങ്ങളും എഴുതുന്നു. 2022ൽ പുറത്തിറങ്ങിയ ‘ഉറങ്ങാത്ത ജനാല’ എന്ന കവിതാസമാഹാരമാണ് ടോബി തലയലിന്റെ ആദ്യകൃതി.
രണ്ടാമത്തെ പുസ്തകമായ ‘വരി തെറ്റിക്കുന്ന വാക്കുകൾ’ പ്രസിദ്ധീകരിച്ചിരിക്കുന്നത് പരിധി പബ്ലിക്കേഷൻസ് ആണ്. തിരുവനന്തപുരത്ത് സ്റ്റാച്യുവിലുള്ള പരിധിയുടെ പുസ്തകശാലയിൽ വരി തെറ്റിക്കുന്ന വാക്കുകൾ എന്ന കവിതാസമാഹാരം ലഭ്യമാകുന്നതാണ്. തപാലിൽ ലഭിക്കാൻ 98 95 68 65 26 എന്ന വാട്സാപ്പ് നമ്പരിൽ ബന്ധപ്പെടുക.