ആരോഗ്യ പ്രവർത്തകരുടെ സേവനം ശ്രീ ബുദ്ധൻ്റെ കാഴ്ച്ചപ്പാടുകൾക്ക് സമം; പ്രധാന മന്ത്രി

ദില്ലി: കൊറോണ പോരാട്ടത്തില്‍ ഇന്ത്യ ലോകത്തിന് മാതൃകയെന്ന് പ്രധാനമന്ത്രി നരേന്ദ്രമോദി. പ്രതിസന്ധികളില്‍ തളരാതെ മുന്നേറുന്നതാണ് ഭാരതത്തിന്റെ പാരമ്പര്യമെന്നും അദ്ദേഹം പറഞ്ഞു. ബുദ്ധപൂര്‍ണിമയില്‍ രാജ്യത്തെ അഭിസംബോധന ചെയ്യുകയായിരുന്നു പ്രധാനമന്ത്രി.

കോവിഡ് പോരാട്ടവും സേവനത്തോടുള്ള ബുദ്ധന്റെ കാഴ്ചപ്പാടും വളരെ മനോഹരമായി അദ്ദേഹം താരതമ്യം ചെയ്തു.

ദയ, കരുണ, സമത, സുഖദുഃഖ ഭേദം ഇല്ലാതിരിക്കുക, അവസ്ഥകളെ അതേ രൂപത്തില്‍ തന്നെ സ്വീകരിക്കുകയെന്ന ബുദ്ധന്റെ നാല് പ്രധാന തത്വങ്ങള്‍ ഓരോരുത്തരുടെയും ജീവിതത്തില്‍ പകര്‍ത്താനും പ്രധാനമന്ത്രി ആഹ്വാനം ചെയ്തു.

”റോഡുകളുടെ ശുചിത്വം പാലിക്കുന്നതില്‍, ആശുപത്രിയില്‍ ശരിയായ സേവനം ഉറപ്പുവരുത്തുന്നതില്‍, വിശന്നിരിക്കുന്ന ഒരാള്‍ക്ക് ഭോജനം നല്‍കുന്നതില്‍ എന്നിങ്ങനെ സദാസമയവും ഏതെങ്കിലുമൊരു സേവയില്‍ മുഴുകിക്കൊണ്ടിരിക്കുന്നവര്‍ എക്കാലത്തും ഭാരതത്തില്‍ നിരവധിയുണ്ട്.

നമ്മളെല്ലാം ഇന്ന് വളരെ വലിയൊരു അപകടത്തെ മറികടക്കാന്‍ കൂട്ടമായി പരിശ്രമിച്ചു കൊണ്ടിരിക്കുകയാണ്. നമ്മള്‍ക്ക് മുന്നില്‍ നില്‍ക്കുന്നത് ആരോഗ്യ പ്രവര്‍ത്തകരാണ്.അവരുടെ സേവനം ശ്രീബുദ്ധന്റെ നിര്‍ദ്ദേശങ്ങള്‍ക്ക് സമാനമാണ്. അവരോടൊപ്പമുള്ള നമ്മുടെ കൂട്ടായ പ്രവര്‍ത്തനം കൊണ്ട് തന്നെ മഹാമാരിയെ നേരിടുന്നതില്‍ ഇന്ത്യ ഇന്ന് ലോകത്തിന് മാതൃകയാണ്” എന്നും പ്രധാനമന്ത്രി കൂട്ടിച്ചേര്‍ത്തു.