ലക്ഷ്മണ രേഖ ലംഘിക്കരുത്.. ഈ യുദ്ധം ജയിച്ചേ തീരൂ; ഭാരതീയരോട് ക്ഷമ ചോദിച്ച് പ്രധാനമന്ത്രി നരേന്ദ്രമോദി

ലോക്ഡൗണിലുണ്ടാവുന്ന ബുദ്ധിമുട്ടുകള്‍ക്കും അസ്വസ്ഥതകള്‍ക്കും ഭാരതത്തിലെ പൗരന്‍മാരോട് ക്ഷമ ചോദിച്ച് പ്രധാനമന്ത്രി നരേന്ദ്രമോദി. നമ്മള്‍ മാത്രമല്ല ലോകം മുഴുവനും കോവിഡിനെതിരെയുള്ള പോരാട്ടത്തിലാണെന്ന് ഓര്‍മ്മിപ്പിച്ച പ്രധാനമന്ത്രി, കടുത്ത നിലപാടുകള്‍ എടുക്കാതെ സര്‍ക്കാരിന് വഴിയില്ലെന്നും വെളിപ്പെടുത്തി.മന്‍ കി ബാത്തില്‍ ജനങ്ങളെ അഭിസംബോധന ചെയ്യുകയായിരുന്നു അദ്ദേഹം.

ക്വാറന്റൈന്‍ അല്ലാതെ മറ്റു വഴികളൊന്നും ഈ മഹാമാരിയെ തടയാന്‍ പര്യാപ്തമല്ലെന്നും, ഈ യുദ്ധം എന്തുവില കൊടുത്തും ജയിച്ചേ തീരൂവെന്നും, കുറച്ചുദിവസം കൂടി ആരും ലോക്ഡൗണ്‍ പ്രഖ്യാപനങ്ങളുടെ ലക്ഷ്മണരേഖ ലംഘിക്കരുതെന്നും പ്രധാനമന്ത്രി അഭ്യര്‍ഥിച്ചു. വിലക്കുകള്‍ ലംഘിക്കുന്നത് കോവിഡിനെതിരായ പോരാട്ടത്തെ പുറകോട്ടടിക്കുമെന്നും പ്രധാനമന്ത്രി ഓര്‍മപ്പെടുത്തി.

ചിലര്‍ ലോക്ക് ഡൗണ്‍ ഗൗരവമായി കാണുന്നില്ലെന്ന് പ്രധാനമന്ത്രി വ്യക്തമാക്കി. ക്വാറന്റൈന്‍ അല്ലാതെ കൊറോണയ്ക്ക് പരിഹാരമില്ല. നിയന്ത്രണങ്ങള്‍ കുറച്ചു ദിവസങ്ങള്‍ക്കൂടി പാലിക്കാന്‍ ഇന്ത്യന്‍ ജനത തയ്യാറാകണം.

മനുഷ്യവര്‍ഗം ഒന്നിച്ചുനിന്ന് നടത്തേണ്ട പോരാട്ടമാണിത്. രാജ്യം ഒറ്റക്കെട്ടായി നിന്ന് മഹാമാരിക്കെതിരെ പോരാടണമെന്നും പ്രധാനമന്ത്രി പ്രതിമാസ റേഡിയോ പരിപാടിയായ മന്‍ കീ ബാത്തില്‍ പറഞ്ഞു.