13 വയസ്സുകാരനെ ലൈംഗിക പീഡനത്തിരയാക്കി; കുഞ്ഞിനും ജന്മം നൽകി; 28 കാരിയായ അദ്ധ്യാപിക അറസ്റ്റിൽ

വാഷിങ്ടണ്‍ : 13 വയസ്സുള്ള വിദ്യാർത്ഥിയെ ലൈംഗിക പീഡനത്തിന് ഇരയാക്കിയ അദ്ധ്യാപിക അറസ്റ്റില്‍. അമേരിക്കയിലെ ന്യൂജേഴ്‌സിയിലാണ് സംഭവം. ന്യൂജേഴ്സിയിലുള്ള ഒരു എലമെന്ററി സ്‌കൂളിലെ അഞ്ചാം ഗ്രേഡ് അദ്ധ്യാപികയായ ലോറ കാരന്‍ എന്ന ഇരുപത്തിയെട്ടുകാരിയാണ് അറസ്റ്റിലായത്. വിദ്യാർത്ഥിയുമായുള്ള ബന്ധത്തില്‍ 2019 ൽ ഒരു കുഞ്ഞിനും അദ്ധ്യാപിക ജന്മം നല്‍കിയിരുന്നു. അദ്ധ്യാപിക ഫെയ്‌സ്ബുക്കിൽ പങ്കുവെച്ച കുഞ്ഞിന്റെ ചിത്രത്തിന് തന്റെ മകനുമായുള്ള രൂപസാദൃശ്യം രക്ഷിതാക്കളുടെ ശ്രദ്ധയില്‍പ്പെട്ടതാണ് സത്യം പുറത്തുവരാന്‍ കാരണമായത്. തുടര്‍ന്ന് വിദ്യാർത്ഥിയുടെ പിതാവ് ചോദ്യം ചെയ്തതോടെ 19 കാരന്‍ കുറ്റസമ്മതം നടത്തുകയായിരുന്നു.അദ്ധ്യാപിക തന്നെ ലൈംഗികമായി പീഡിപ്പിക്കുകയായിരുന്നുവെന്ന് വിദ്യാർത്ഥി പോലീസ് ഉദ്യോഗസ്ഥരോട് സമ്മതിച്ചു. ലൈംഗിക പീഡനം അടക്കമുള്ള വകുപ്പുകള്‍ ചുമത്തിയാണ് അദ്ധ്യാപികയ്ക്കെതിരേ കേസെടുത്തിരിക്കുന്നത്.

2016 മുതല്‍ 2020 വരെയാണ് കേസിന് ആസ്പദമായ സംഭവം നടന്നത്. ഇപ്പോൾ 19 വയസുള്ള വിദ്യാർത്ഥിയുടെ വീട്ടുകാരും അദ്ധ്യാപികയും തമ്മില്‍ ഏറെ നാളത്തെ അടുപ്പമുണ്ടായിരുന്നു. വിദ്യാർത്ഥിയെയും രണ്ട് സഹോദരങ്ങളെയും ഇടയ്ക്ക് അദ്ധ്യാപികയുടെ വീട്ടില്‍ നില്‍ക്കാനായി വീട്ടുകാര്‍ അനുവദിച്ചിരുന്നു. 2016 മുതല്‍ 2020 വരെയുള്ള കാലയളവില്‍ വിദ്യാര്‍ഥി അദ്ധ്യാപികയുടെ വീട്ടില്‍ നിരന്തരം താമസിച്ച കാലത്ത് അദ്ധ്യാപിക വിദ്യാർത്ഥിയെ ലൈംഗിക പീഡനത്തിന് ഇരയാക്കുകയായിരുന്നു. തുടര്‍ന്നാണ് 2019-ല്‍ അദ്ധ്യാപിക ഒരു കുഞ്ഞിന് ജന്മം നല്‍കുന്നത്. ഇത് കുറ്റം തെളിയുന്നതിൽ നിർണായകമായിരുന്നു.