നെയ്യാറ്റിൻകരയിൽ 1300 കിലോ നിരോധിത ലഹരിവസ്തുക്കൾ പിടികൂടി; മലപ്പുറം സ്വദേശികളായ മുഹമ്മദ് റാഫി, ഷാഹുൽ എന്നിവർ അറസ്റ്റിൽ

നെയ്യാറ്റിൻകര : തിരുവനന്തപുരം നെയ്യാറ്റിൻകരയിൽ പിക്കപ്പ് വാനിൽ കടത്താൻ ശ്രമിച്ച 1300 കിലോ നിരോധിത ലഹരിവസ്തുക്കൾ എക്സൈസ് സംഘം പിടികൂടി. മലപ്പുറം സ്വദേശികളായ രണ്ടുപേരെ കസ്റ്റഡിയിലെടുത്തു. വളംചാക്കുകൾക്കിടയിൽ ഒളിപ്പിച്ചു കടത്താനുള്ള ശ്രമത്തിനിടെ ശനിയാഴ്ച പുലർച്ചെ അഞ്ചുമണിയോടെയാണ് ആറാലുംമൂട്ടിൽവെച്ച് ലഹരിവസ്തുക്കൾ പിടികൂടിയത്.

മലപ്പുറം സ്വദേശികളായ വാഹനത്തിന്റെ ഡ്രൈവർ മുഹമ്മദ് റാഫി(25), ഷാഹുൽ(22) എന്നിവരെയാണ് കസ്റ്റഡിയിലെടുത്തത്. പെരുമ്പാവൂരിൽനിന്നാണ് ലഹരിവസ്തുക്കൾ പലസ്ഥലങ്ങളിലായി വിതരണം ചെയ്യാനായി എത്തിച്ചതെന്നു പിടിയിലായവർ എക്സൈസ് സംഘത്തോടു പറഞ്ഞു. ഇവർ കോട്ടയം, കാരേറ്റ്, പൂങ്കുളം എന്നിവിടങ്ങളിലായി 700 കിലോയോളം ലഹരിവസ്തുക്കൾ കൊടുത്തിരുന്നു.

ലഹരിവസ്തുക്കൾ രഹസ്യമായി ചില്ലറവില്പനയ്ക്കായി കൊണ്ടുവരുന്നെന്ന രഹസ്യസന്ദേശം ലഭിച്ചതിനെത്തുടർന്ന് ആറാലുംമൂട് കെ.എ.എലിനു സമീപംവെച്ച് പിക്കപ്പ് വാൻ തടഞ്ഞുനിർത്തി പരിശോധിക്കുമ്പോഴാണ് ലഹരിവസ്തുക്കൾ കണ്ടെടുത്തത്. ഇവ നിറച്ച വലിയ പായ്ക്കറ്റുകൾ താഴെയറ്റത്തായി നിരത്തിയശേഷം മുകളിൽ വളത്തിന്റെ ചാക്കുകൾ നിറച്ചാണ് വാഹനത്തിൽ കൊണ്ടുവന്നത്. സംസ്ഥാനത്ത് നിരോധിച്ച പാൻപരാഗ്, ഗുഡ്ക പോലുള്ള ലഹരിവസ്തുക്കളാണ് പിടിച്ചെടുത്തത്. പെരുമ്പാവൂരിലെ മൊത്തവിതരണകേന്ദ്രത്തിൽനിന്നു ചില്ലറവില്പന നടത്താനായി എത്തിച്ചവയാണ് പിടികൂടിയത്. പ്രതികളെ നിയമപരമായി പിഴ അടപ്പിച്ചു. ഇതിനുശേഷം പ്രതികളെയും ലഹരിവസ്തുക്കൾ കടത്താനുപയോഗിച്ച പിക്കപ്പ് വാനും പോലീസിന് കൈമാറി.