സുഹൃത്തുക്കൾ തമ്മിലെ തർക്കം അവസാനിച്ചത് ‘കത്തിക്കുത്തിൽ’; താനെയിൽ 15 വയസ്സുകാരന് ദാരുണാന്ത്യം

താനെ: സുഹൃത്തുക്കൾ തമ്മിലെ തർക്കത്തിനിടയിൽ പതിനഞ്ചു വയസുകാരൻ (Murder) കുത്തേറ്റുമരിച്ചു.താനെ മുനിസിപ്പൽ ജീവനക്കാരൻ്റെ മകനായ പത്താം ക്ലാസുകാരനാണ് കൊല്ലപ്പെട്ടത്. സംഭവത്തിൽ മൂന്ന് വിദ്യാർത്ഥികൾക്കെതിരെ പോലീസ് കൊലക്കുറ്റത്തിനു കേസെടുത്തു. ഇവരെ പിടികൂടിയിട്ടുണ്ട്. എന്നാൽ ഒരാൾ ഒളിവിലാണ്.

താനെ വാഗിൾ എസ്റ്റേറ്റിലെ ഷാഹു മഹാരാജ് സ്കൂളിലാണ് സംഭവം നടന്നത്. തർക്കവും, കൊലപാതകവും സിസിടിവി ക്യാമറയിൽ പതിഞ്ഞിരുന്നു. ഇത് പരിശോധിച്ചാണ് പോലീസ് മൂന്ന് വിദ്യാർത്ഥികളെ അറസ്റ്റ് ചെയ്തത്. പോലീസ് പറയുന്നത് പ്രകാരം കുറച്ചു ദിവസങ്ങൾക്കു മുൻപ് സ്കൂളിൽ അഡ്മിഷൻ നേടിയ കുട്ടി തിങ്കളാഴ്ച സഹപാഠിയുമായി തർക്കത്തിലാകുകയിരുന്നു.

ഇതിനുപിന്നാലെ ചൊവ്വാഴ്ച നടന്ന തർക്കത്തിൽ കുട്ടിയെ 4 പേർ ചേർന്ന് ആക്രമിച്ചു. ഒരു വിദ്യാർത്ഥി കത്തിയെടുത്ത് കുത്താൻ ശ്രമിച്ചപ്പോൾ മറ്റൊരാൾ തടഞ്ഞു. ഇതിനിടെ തടയാൻ ശ്രമിച്ച കുട്ടിയുടെ നെഞ്ചിൽ കുത്തേൽക്കുകയായിരുന്നു. ഇതോടെ ഭയന്ന വിദ്യാർത്ഥികൾ സ്ഥലം വിട്ടു. കൊല്ലപ്പെട്ട വിദ്യാർത്ഥിയുടെ മൃതദേഹം ലഭിച്ചതിനു പിന്നാലെ പോലീസ് അന്വേഷണം ആരംഭിക്കുകയും മൂന്ന് വിദ്യാർത്ഥികളെയും അവരവരുടെ വീടുകളിൽ നിന്ന് പിടികൂടുകയുമായിരുന്നു. അതേസമയം ഇനി പിടികൂടാനുള്ള ഒരു കുട്ടിയ്ക്കായി തിരച്ചിൽ ഊർജ്ജിതമാക്കിയിരിക്കുകയാണ് പോലീസ്.