15 കാരന്റെ കൈയ്യിൽ നിന്ന് തോക്ക് പൊട്ടി!!നാലുവയസുകാരന് ദാരുണാന്ത്യം ; അമ്മ തീവ്രപരിചരണ വിഭാഗത്തിൽ

ബെംഗളൂരു: അബദ്ധത്തിൽ 15 കാരന്റെ കൈയ്യിൽ നിന്ന് തോക്ക് പൊട്ടി നാലുവയസുകാരന് ദാരുണാന്ത്യം. കർണാടകയിലെ മാണ്ഡ്യ നാഗമംഗലത്താണ് സംഭവം. പശ്ചിമബംഗാൾ സ്വദേശികളുടെ മകൻ അഭിജിത്താണ് മരിച്ചത്. നാഗമംഗലത്തെ കോഴിഫാമിൽ ഇന്നലെ വൈകുന്നേരം 6 മണിയോടെയായിരുന്നു സംഭവം.

ഫാംനടത്തിപ്പുകാർ മുറിയിൽ തോക്ക് സൂക്ഷിച്ചിരുന്നു. തോക്ക് പുറത്തെടുത്ത് വെച്ച ശേഷം ഇവർ പുറത്തേക്ക് പോയി. ഈ നേരം ജോലിക്കായി പശ്ചിമബംഗാളിൽ നിന്നെത്തിയ 15 കാരൻ ഇവിടേക്കെത്തി. തോക്ക് കണ്ട 15-കാരൻ അതെടുത്ത് പരിശോധിക്കുകയും അബദ്ധത്തിൽ ട്രിഗർ വലിക്കുകയുമായിരുന്നു. രണ്ട് തവണ വെടിപൊട്ടിയെന്നാണ് വിവരം. ആദ്യത്തെ വെടിയാണ് തൊട്ടടുത്തുണ്ടായിരുന്ന നാലുവയസുകാരന്റെ വയറ്റിൽ തറച്ചത്. രണ്ടാമത്തേത് നാലുവയസുകാരന്റെ അമ്മയുടെ കാലിലും തറച്ചു. അമിതരക്തസ്രാവത്തെത്തുടർന്നാണ് കുട്ടി മരിച്ചത്. കുട്ടിയുടെ അമ്മ തീവ്രപരിചരണ വിഭാഗത്തിൽ പ്രവേശിപ്പിച്ചു.