ബംഗ്ലാദേശിൽ നിന്ന് 190 നയതന്ത്ര ഉദ്യോഗസ്ഥരും കുടുംബവും തിരികെയെത്തി! മടങ്ങിയെത്തിയത് ഹൈകമ്മീഷന്റെ പ്രവർത്തനത്തിന് അത്യാവശ്യമല്ലാത്ത ഉദ്യോഗസ്ഥർ

കലാപം തുടരുന്ന ബംഗ്ലാദേശിലെ ഇന്ത്യൻ ഹൈകമ്മീഷനിൽ നിന്നുള്ള 190 ജീവനക്കാരേയും അവരുടെ കുടുംബത്തേയും എയർ ഇന്ത്യയുടെ പ്രത്യേക വിമാനത്തിൽ നാട്ടിലെത്തിച്ചു. ധാക്കയിലെ ഇന്ത്യൻ ഹൈകമ്മീഷനിലെ ഉദ്യോഗസ്ഥരാണിവർ. ഹൈകമ്മീഷന്റെ പ്രവർത്തനത്തിന് അത്യാവശ്യമല്ലാത്ത ഉദ്യോഗസ്ഥരാണ് മടങ്ങിയെത്തിയത് എന്നാണ് വിവരം. ബാക്കിയുള്ള നയതന്ത്ര വിദ​ഗ്ധർ ബം​ഗ്ലാദേശിൽ പ്രവർത്തിക്കുന്നുണ്ടെന്നാണ് റിപ്പോർട്ട്. ഹൈക്കമ്മീഷനിലെ മുപ്പതോളം മുതിര്‍ന്ന ഉദ്യോ​ഗസ്ഥരാണ് നിലവില്‍ അവിടെ തുടരുന്നത്.

ധാക്കയ്ക്കു പുറമെ, ചിത്തഗോങിലും രാജ്ഷാഹിയിലും ഖുല്‍നയിലും സില്ലെറ്റിലും ഇന്ത്യയ്ക്ക് അസിസ്റ്റന്റ് ഹൈക്കമ്മീഷനുകളോ കോണ്‍സുലേറ്റുകളോ പ്രവർത്തിക്കുന്നുണ്ട്.

ഏകദേശം 10,000 ഇന്ത്യക്കാരാരാണ് ബംഗ്ലാദേശിൽ ഉള്ളത്. അതിൽ ഏറിയപങ്കും വിദ്യാർത്ഥികളാണ്. അവരുമായി കേന്ദ്ര സര്‍ക്കാര്‍ തുടര്‍ച്ചയായി ബന്ധപ്പെടുന്നുണ്ട്. ബംഗ്ലാദേശിൽ നിന്ന് ഇന്ത്യക്കാരെ പെട്ടെന്നു തന്നെ ഒഴിപ്പിക്കേണ്ട സാഹചര്യമില്ലെന്ന് കേന്ദ്ര വിദേശകാര്യമന്ത്രി എസ്. ജയ്‌ശങ്കർ നേരത്തെ പറഞ്ഞിരുന്നു.