കൊച്ചിയിൽ വീട് കുത്തിത്തുറന്ന് 25 ലക്ഷവും സ്വര്‍ണവും കവര്‍ച്ച ചെയ്യപ്പെട്ട സംഭവം; പ്രതി കൽവാത്തി സ്വദേശി അബ്ദുൽ റഹീം പിടിയിൽ

കൊച്ചി : ഫോർട്ട് കൊച്ചി ചിരട്ടപ്പാലത്തുള്ള വീട്ടിൽ വൻ കവർച്ച നടത്തിയ പ്രതി അറസ്റ്റിൽ. ലൊക്കേഷൻ മാനേജറായി ജോലിചെയ്യുന്ന കൽവാത്തി സ്വദേശി അബ്ദുൽ റഹീമാണ് പോലീസിന്റെ പിടിയിലായത്. ഇക്കഴിഞ്ഞ മാർച്ച് 26 നാണ് വീട് കുത്തിത്തുറന്ന് 25 ലക്ഷം രൂപയും സ്വർണാഭരണങ്ങളും ഡിജിറ്റൽ ക്യാമറയുമടക്കം ഇയാൾ കവർന്നെടുത്തത്.

വീട്ടുകാര്‍ പള്ളിയില്‍ പോയ സമയത്തായിരുന്നു അതിക്രമം നടന്നത്. ഫോര്‍ട്ട്കൊച്ചി ബീച്ചില്‍ ഫുഡ് കോര്‍ട്ട് നടത്തുകയാണ് അറസ്റ്റിലായ അബ്ദുൽ റഹീം. സിനിമകളുടെ ലൊക്കേഷന്‍ മാനേജരായും പ്രവര്‍ത്തിച്ചിട്ടുള്ള ഇയാള്‍ സിനിമകളില്‍ ചെറിയ വേഷങ്ങളിൽ പ്രത്യക്ഷപ്പെട്ടിട്ടുണ്ട് . കേസിലെ ഇയാളുടെ കൂട്ട്പ്രതി ചക്കിട്ടപറമ്പ് സ്വദേശി മുജീബിനെ കഴിഞ്ഞ ദിവസം പോലീസ് പിടികൂടിയിരുന്നു.

ഇയാൾ ഫോർട്ട് കൊച്ചി, മട്ടാഞ്ചരി പൊലീസ് സ്റ്റേഷനുകളിൽ മുൻപ് അടിപിടി, ലഹരിമരുന്ന് ഉപയോഗം എന്നീ കേസുകളുൽ ഉൾപ്പെട്ടിട്ടുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.