റഷ്യൻ സൈന്യത്തിൽ നിർബന്ധിത ജോലി ചെയ്തിരുന്ന 45 ഇന്ത്യക്കാരെ മോചിപ്പിച്ചു ; നിർണായകമായത് ജൂലൈ മാസത്തിലെ മോദി- പുടിൻ കൂടിക്കാഴ്ച

യുക്രെയ്ൻ യുദ്ധവുമായി ബന്ധപ്പെട്ട് റഷ്യൻ സൈന്യത്തിൽ നിർബന്ധിത ജോലി ചെയ്തിരുന്ന 45 ഇന്ത്യക്കാരെ മോചിപ്പിച്ചതായി വിദേശകാര്യ മന്ത്രാലയം. അമ്പതിലധികം ഇന്ത്യക്കാര്‍ ഇനിയും യുദ്ധമുഖത്തുണ്ട്. ഇവരെ കൂടി മോചിപ്പിക്കാനുള്ള ശ്രമം നടക്കുകയാണെന്നും വിദേശകാര്യ മന്ത്രാലയ വക്താവ് വ്യക്തമാക്കി. പ്രധാനമന്ത്രി നരേന്ദ്ര മോദിയും റഷ്യന്‍ പ്രസിഡന്റ് വ്ളാഡിമിർ പുടിനും തമ്മില്‍ നേരത്തേ നടന്ന കൂടിക്കാഴ്ചയിലാണ് ഇന്ത്യക്കാരുടെ മോചനത്തിനു വഴിതുറന്നത്.

മനുഷ്യക്കടത്ത് സംഘമാണ് സാമൂഹിക മാദ്ധ്യമങ്ങളും പ്രാദേശിക ഏജന്റുമാരെയും ഉപയോഗിച്ച് നിരവധി യുവാക്കളെ റഷ്യയിലെത്തിച്ചത്. സെക്യൂരിറ്റി ജോലിയും ഉയർന്ന ശമ്പളവുമെന്ന വാഗ്ദാനത്തില്‍ കുടുങ്ങി നിരവധി യുവാക്കള്‍ റഷ്യയിലെത്തിയെന്നാണ് കരുതുന്നത്. റഷ്യയിലെത്തുന്നതോടെ ഇവരുടെ യാത്രാരേഖകള്‍ പിടിച്ചുവെക്കുകയും അത്യാവശ്യം ആയുധ പരിശീലനം നല്‍കി യുക്രൈനില്‍ സൈനിക സേവനത്തിന് അയക്കുകയുമാണ് ചെയ്യുന്നത്. റഷ്യയിൽ ആർമി സെക്യൂരിറ്റി ഹെൽപർ തസ്തികയിലേക്ക് ജോലിയിൽ നിയമിച്ചിരുന്ന ഇവരെ പിന്നീട് യുക്രെയ്നിലെ ഡോണെറ്റ്‌സ്‌കിൽ യുദ്ധമുഖത്തു ഡ്യൂട്ടിക്കു നിയോഗിക്കുകയായിരുന്നു.