വിവാഹാഭ്യർത്ഥന നിരസിച്ചു , 16കാരിയായ ജീവനക്കാരിയെ കത്തിക്കൊണ്ട് കുത്തി റോഡിലൂടെ വലിച്ചിഴച്ച് 47കാരനായ പലചരക്ക് കട ഉടമ

റായ്പുർ : വിവാഹാഭ്യർത്ഥന തള്ളിയതിനെത്തുടർന്ന് പതിനാറുകാരിയായ പെൺകുട്ടിയെ 47 കാരൻ കത്തികൊണ്ട് കുത്തി പരിക്കേൽപ്പിച്ചശേഷം മുടിയിൽ പിടിച്ച് റോഡിലൂടെ വലിച്ചിഴച്ചു. ഇക്കഴിഞ്ഞ ശനിയാഴ്ചയാണ് റായ്പുരിൽ ഞെട്ടിക്കുന്ന സംഭവം അരങ്ങേറിയത്. ആക്രമണത്തിൽ ഗുരുതരമായി പരിക്കേറ്റ പെൺകുട്ടിയെ ആശുപത്രിയിൽ പ്രവേശിപ്പിച്ചു. സംഭവത്തിൽ ഓംകാർ തിവാരി എന്ന മദ്ധ്യവയസ്കനെ പൊലീസ് അറസ്റ്റ് ചെയ്തു.

റായ്പൂർ നഗരത്തിലെ ഗുധിയാരി ഏരിയയിലുള്ള പ്രതിയുടെ പലചരക്ക് കടയിലാണ് പെൺകുട്ടി ജോലി ചെയ്തിരുന്നത്. ശനിയാഴ്ച രാത്രിയോടെ പെൺകുട്ടിയുടെ വീട്ടിലേക്ക് മദ്യപിച്ചു ലക്ക്കെട്ട ഇയാൾ അതിക്രമിച്ച് കയറി പെൺകുട്ടിയെ കത്തികൊണ്ട് ആക്രമിക്കുകയും കഴുത്തിൽ മാരകമായി മുറിവേൽപ്പിക്കുകയുമായിരുന്നു. ഓടി രക്ഷപ്പെടാൻ ശ്രമിച്ച പെൺകുട്ടിയെ ഓംകാ‌ർ പിന്തുടർന്ന് പിടികൂടി മുടിയിൽ പിടിച്ച് വലിച്ചിഴച്ചു.

ഓംകാ‌റിന്റെ വിവാഹാഭ്യർത്ഥന പെൺകുട്ടി നിരസിച്ചതാണ് ആക്രമണത്തിലെത്തിച്ചതെന്ന് പോലീസ് പറഞ്ഞു. ഇരുവരും തമ്മിൽ പണമിടപാട് സംബന്ധിച്ചും തർക്കമുണ്ടായിരുന്നെന്നും പറയപ്പെടുന്നു.