ജാർഖണ്ഡിൽ വീണ്ടും ഘർവാപ്പസി; ഇരുനൂറിലധികം വനവാസി സമുദായ അംഗങ്ങൾ സനാതന ധർമ്മത്തിലേക്ക് മടങ്ങിയെത്തി; പവിത്രമായ ഗംഗാജലം നൽകി സ്വീകരണം

ജാർഖണ്ഡിൽ വീണ്ടും ഘർവാപ്പസി. വനവാസി സമൂഹത്തിൽ നിന്നുള്ള ഇരുനൂറോളം പേർ സനാതന മതത്തിലേക്ക് മടങ്ങിയെത്തി. ഗോയിൽകേര ബ്ലോക്കിലെ പാർലിപോസ് ഗ്രാമത്തിലെ 68 കുടുംബങ്ങളിലെ ഇരുനൂറോളം പേരാണ് ഹിന്ദുമതം സ്വീകരിച്ചത്.ജഗദ്ഗുരു ശങ്കരാചാര്യ സദാനന്ദ് ജി മഹാരാജ് പവിത്രമായ ഗംഗാജലം നൽകിയാണ് അവരെ സ്വാഗതം ചെയ്തത് . വിശ്വ കല്യാൺ ആശ്രമമാണ് പരിപാടി സംഘടിപ്പിച്ചത്.

മതപരിവർത്തന ശക്തികൾ നൽകിയ വ്യാജ വാഗ്ദാനങ്ങളിൽപ്പെട്ടാണ് ഇവരുടെ പൂർവ്വികർ നേരത്തെ മറ്റ് മതങ്ങൾ സ്വീകരിച്ചത്. ജഗദ്ഗുരു ശങ്കരാചാര്യ അടുത്തിടെ ജില്ലയിലെ നിരവധി ഗ്രാമങ്ങളിൽ ബോധവൽക്കരണ സന്ദേശങ്ങൾ നൽകിയിരുന്നു. ശങ്കരാചാര്യരുടെ സന്ദേശത്തിൽ നിന്ന് പ്രചോദനം ഉൾക്കൊണ്ടാണ് 68 കുടുംബങ്ങൾ സനാതനധർമ്മത്തിലേക്ക് മടങ്ങിയെത്തിയത്.

ജാർഖണ്ഡ്, ഛത്തീസ്ഗഢ്, മധ്യപ്രദേശ്, ഒഡീഷ തുടങ്ങിയ സംസ്ഥാനങ്ങളിലെ വനവാസികൾ അടക്കമുള്ള പിന്നോക്ക വിഭാഗങ്ങളെ ജോലി, ആരോഗ്യ സംരക്ഷണം, സാമ്പത്തിക സഹായം, കുട്ടികൾക്ക് സൗജന്യ വിദ്യാഭ്യാസം എന്നിവ വാഗ്ദാനം ചെയ്താണ് മിഷനറിമാർ അടക്കം മതം മാറ്റിയിരുന്നത്. കോടിക്കണക്കിന് ഡോളറിന്റെ പദ്ധതികൾ മിഷനറി സംഘടനകൾ ഈ പ്രദേശങ്ങളിൽ മതപരിവർത്തനം ലക്ഷ്യമിട്ട് നടത്തിയിട്ടുണ്ട്.