കൊച്ചിയിലെ തൊഴിൽ പീഡനത്തിൽ വമ്പൻ ട്വിസ്റ്റ് !! ഉണ്ടായത് തൊഴില്‍ പീഡനമല്ലെന്നും ദൃശ്യങ്ങൾ പ്രചരിപ്പിച്ചത് മുൻ ജീവനക്കാരനെന്നും യുവാവിന്റെ മൊഴി

കൊച്ചിയിലെ മാര്‍ക്കറ്റിങ് സ്ഥാപനത്തില്‍ മനുഷ്യത്വ രഹിതമായ തൊഴില്‍ പീഡനം നടന്നെന്ന ആരോപണത്തില്‍ വഴിത്തിരിവ്. ഉണ്ടായത് തൊഴില്‍ പീഡനമല്ലെന്ന് പുറത്തുവന്ന ദൃശ്യങ്ങളില്‍ കാണുന്ന യുവാവ് പോലീസിനും തൊഴില്‍ വകുപ്പിനും പ്രാഥമിക മൊഴി നൽകി. ലഹരിക്ക് അടിമയായ മനാഫ് എന്ന ജീവനക്കാരന്‍ മാസങ്ങള്‍ക്കു മുമ്പ് നിര്‍ബന്ധിച്ച് ചിത്രീകരിച്ചതാണ് വീഡിയോ എന്നും സ്ഥാപന ഉടമയെ മോശക്കാരനാക്കാനായി ഇപ്പോള്‍ തന്‍റെ അനുമതിയില്ലാതെ ദൃശ്യങ്ങള്‍ പ്രചരിപ്പിച്ചെന്നും യുവാവ് മൊഴി നല്‍കിയിട്ടുണ്ട്. ക്രൂരത കാട്ടിയ മനാഫിനെ നേരത്തെ തന്നെ സ്ഥാപന ഉടമ പുറത്താക്കിയിരുന്നെന്നും താന്‍ ഇപ്പോഴും സ്ഥാപനത്തില്‍ ജോലി ചെയ്യുന്നുണ്ടെന്നും യുവാവ് പറയുന്നു.

സ്വകാര്യ മാര്‍ക്കറ്റിങ് സ്ഥാപനം ടാര്‍ജറ്റ് അച്ചീവ് ചെയ്യാത്ത ചെറുപ്പക്കാരെ ഇത്തരത്തിൽ ശിക്ഷിക്കുന്നെന്ന ആരോപണമാണ് ഉയര്‍ന്നത്. കഴിഞ്ഞ വര്‍ഷം സെപ്തംബറിലാണ് ഈ സംഭവം നടന്നതെന്നും ഇതടക്കം ക്രൂരമായ ശിക്ഷകള്‍ സ്ഥാപനത്തില്‍ നിന്ന് നേരിടേണ്ടി വന്നിട്ടുണ്ടെന്നും ഏതാനും മാസങ്ങള്‍ മുമ്പു വരെ ഇവിടെ ജോലി ചെയ്തിരുന്ന ഫോര്‍ട്ട് കൊച്ചി സ്വദേശി വെളിപ്പെടുത്തിയിരുന്നു. ദൃശ്യങ്ങൾ വ്യാപകമായി പ്രചരിക്കുകയും സമൂഹത്തിന്റെ നാനാ തുറകളിൽ നിന്ന് പ്രതിഷേധം ഉയരുകയും ചെയ്തതോടെ ഇതോടെ തൊഴില്‍ വകുപ്പും പോലീസും അന്വേഷണവും തുടങ്ങി. ഹിന്ദുസ്ഥാന്‍ പവര്‍ ലിങ്ക്സിന് സംഭവവുമായി ബന്ധമില്ലെന്ന് പാലാരിവട്ടം പോലീസ് അറിയിച്ചു. അതിനിടെയാണ് യുവാവിന്റെ മൊഴി പുറത്തു വന്നത്.

കൂടുതല്‍ ജീവനക്കാരില്‍ നിന്ന് മൊഴിയെടുത്തശേഷം അടുത്ത ദിവസം വിശദമായ റിപ്പോര്‍ട്ട് തൊഴില്‍ വകുപ്പ് മന്ത്രിക്ക് നല്‍കുമെന്ന് തൊഴില്‍ വകുപ്പ് ജില്ലാ ഓഫിസര്‍ അറിയിച്ചു.